SÄHER SEDASY
(Halky äheňler)


Daglara
Çal başy – arşyň düşlegi,
Däli dünýäniň düýşleri.
Ýok, häki ýolum düşmedi,
Ýörite geldim daglara.

Zyýaratdyr ýolun sökmek,
Ybadatdyr şöwrün çekmek,
Pikir-oýum sap-sap, lek-lek –
Ýörişe geldim daglara.

Ne uçup, ne ýerläp bildim,
Göwni Bire birläp bildim,
Ulug sandym,
Dergäh bildim,
Müride geldim daglara.

Boýun ölçäp garyş-garyş,
Menzil geçdim geriş-geriş,
Ýüregme dakyldy eriş,
Hyruja geldim daglara.

Ýollara saldym ömrümi,
Kaýdan çykarar öwrümi?!
Ýellerden ýüwrük göwnümi
Ýüwürde geldim daglara.

Asmana sütün-söýe-ha,
Heňňama ýalňyz eýe-ha!
Men bir düýş gördüm oýakam,
Ýorguda geldim daglara.

21.11.2020

Säher sedasy

Dilener men,
dillener men adyňa,
Ýazyň heser-heýjanyny ber maňa!
Ýetir tomus çogun güýzüň dadyna,
Gyşyň aklyk serpaýyny ber maňa!

Başym aýlap ak ýagyşlaň jybary,
Ýuwulsyn göwnümiň gerdi-gubary,
Beýhuş etsin däli dünýäň humary,
Ber, ylhamyň meý jamyny ber maňa!

Eleslär, alysy höweslär göwnüm,
Käte tüweleýlär, gaý islär göwnüm,
Ertir-agşam özün seýislär göwnüm,
Ýüzin salar meýdanyny ber maňa!

Köwsar urup çykyp janu-jigerden,
Belent galyp çäk-çelgiden, çygyrdan,
Köpri bolsun,
supra bolsun şygyrlam,
Köňüllerde ýer-jaýyny ber maňa!

Herne barym – dünýä aşyk kalbym bar!
Müň şükürim hem müňde bir arzym bar.
Ýa Biribar, dergähiňde parzym bar,
Ber,
birkemsiz berjaýyny ber maňa!

23.11.20.

 
Hoş gelip sen...

Hoş gelip sen, mähribanym, merhaba!
Dem eçilen howam bolup geldiňmi?!
Dileg kyldym gol göterip her saba,
Haka gowşan dogam bolup geldiňmi?!

Aňym ýetmez niçik söwdalygyňa,
Goýduňmy bir ömür şeýdalygyňa
ýa-da soltan eýläp yşk şalygyna,
Depäm üzre jygam bolup geldiňmi?!

Duçar bolup seniň kibi mahbuba,
Öwrülip barýaryn niçik mahluga,
Dönderdiňmi dil-agyzdan mahruma,
Bilbilgöýä zyban bolup geldiňmi?!

Göwünmidir yşkyň öýi-öwzary,
Aňşyrmadym, niçik niýet-öwzaýy,
Halys eňkim agdyranda jöwzasy,
Misli çisňi-jybar bolup geldiňmi?!

Bilebilmen,
rakypmy ýa dostmy sen,
Perýatmy ýa arşa ýeten datmy sen,
Bu ne alaw – kalba düşen otmy sen,
Ýa tüm içre çyrag bolup geldiňmi?

22.11.20

 
Meni

Götermiş ak arzuwlar,
Perwerdigäre meni.
Ýetirmiş aýu-ýyllar
Sen deý nigäre meni.

Ah, gara göz, galam gaş,
Didelem ýaş,
syrym – paş,
Aklym eýläp çalam-çaş,
Kyldyň awara meni.

Dözüp pyrkat-pygana,
Saýradym aşygana,
Söýgiň müň bir zybana
Eýlär suwara meni.

Yşk geler, güzer eýlär,
Ser göçer, tüweleýlär.
Ala gözler ters aýlar,
Öwrüp juwaza meni.

Seniň yşkyň yklan men,
Kalbyn kalba myhlan men,
Tapmarsyň, ýar, –
Myhman men –
Dagy-duwara meni.

23.11.20.



Kakamyrat REJEBOW.