Sen ol gyzy taňokdyňam asla,
Bilýän janym, seni ejeň öýerdi.
Belki öýlenmezdiň özüňe galsa,
Ýaşyň ýetdi diýip, ejeň öýerdi.

Durmuşa garaýşyň başgady entek,
"Söýüp, halap toý etmeli" diýerdiň.
Ejeň gurnan eken başgarak geljek,
Saňa galsa entek-entek gezerdiň.

Ýumrulan söýgümi agzajagam däl,
Seňem arzuwlaryň ýykyldy gerek?
Özüm hakda hiç zat gozgajagam däl,
Ullakan boşluk dur bagtyma derek.

İşeňňir ekeni ejeň saýlany,
Ýerindemiş görk-görmegi, edebi.
Ejeň diýýän bolsa bardyr bilýäni,
Ejeň sözün diňläp basgyn gadamy.

Başyň göge galdyr, geljege seret,
Oňarsaň ol gyza söýgünem döret.
Meni hiç ýatlama, sen meni unut!
Men bilýän-ä sende günä ýoklugyny,
Seň ýüregiň ak gardanam aklygyny.

Meniň ýarym diňe meni söýerdi,
Bilýän janym, seni ejeň öýerdi.?

Gözel ŞAMYRADOWA