Ýekeje zatdy islegim:
Men özüme, öňküligme dolansam.
Seret, bolşum...
Ruhum göwräm bilen sersepil yrap,
Syrly gijelerde çekýän hasratym,
Geçýän günlerimi gussama sarap,
Ýalňyz yşkym bilen özgerip bilşim.


Iň soňky ýapragyn baldakda saklan,
Teşnelikden guran gülüň solşy deý,
Umydym ýitirmän ýaşajak bolşum.
Gör, birwagtky hondanbärsi keşbini
Dünýäni topukdan saýmaýan gyzyň,
Tumşugy ýokarda gedemjäň bolşun.
Indem merdemsiräp iliň ýüzüne,
Ýalançyň ýüzünde azaşyp ýörşün.


Çolaran dünýäde yşk bilen galyp,
Ökünç bilen ötünç sorap sabada,
Ýaradana ýalbaryplar,
Ýadyrgaplar dünýeden.
Golun serip,
Sabyr diläp
Garaşýanyny gör näbelli zada.


Iki jahan owarrasy janyny
Saklap bilmän çalajan ruhda,
Ne ýazyp bilşini gör,
Ne ýaşap bilşin...

Bilbil KAKABAÝEWA