???
Käte näme, bolaýýan zat,
Keýpim bir ýüz bäşdi, dostlar.
Agşamara. Bir perizat
Awtobusdan düşdi, dostlar.
Oturgyja golaý bardy,
Demin dürsäp biraz durdy.
Soň gyssanyp ýöräberdi –
Duralga-da boşdy, dostlar.
-“Aýalymyň işde wagty,
(Keselhanada nobaty),
Sypdyrmaýyn beýle bagty,
Sähetli gün duşdy, dostlar”.
diýdim-de men öz-özüme,
Düşüberdim oň yzyna,
Dessandaky şa gyzyna,
Şeýlebir meňzeşdi, dostlar.
Periden asyl döreýşi,
Şaýatdy muňa ýöreýşi,
Ýol ýakany bezäp barşy,
Misli tawus guşdy, dostlar.
Gidip barýar – durmaýardy,
Maňa ünsem bermeýärdi,
Ýa-da asla görmeýärdi,
Aralygam daşdy, dostlar.
Ýetäkgetdiň: -“Aýu, gelin,
aýak çekiň birje salym,
Men bilbiliň, bolaý gülüm”
diýäýmegem işdi, dostlar.
Hudaý eçilse guluna,
Getirip berer eline,
Ne döw çaldy o geline?!
Gapymyzy açdy, dostlar.
Haýdan-haý özümi dürsäp,
Yzy bilen girsem kürsäp,
-“Bu günem geldiňmi porsap?!”
diýip, töre geçdi, dostlar.
Işden jogap alyp çykan,
Wah, Mežnun eden ýerçeken,
Ol meniň öz gelnim eken,
Ähli keýpim gaçdy, dostlar.
Oraznepes BAÝRAMOW.
3комментария
Чтобы оставить комментарий, необходимо на сайте.
