RUBAGYLAR

Balary diýenmiş: "Uýup her güle,
Gül waspyny ýazýan syýam -- bal bile.
Barça güli öpüp-guçup ýörsem-de,
Gül yşkyny ýorup ýör il bilbile!".

***
Kalbym bakyş okalgaňy "çokady",
Okalmadyk yşk kitabyň okady.
Gözelligiň tomun ýazan tebigat,
Goýupdyr al ýaňagyňda nokady.

***
Umyt ýok däl elden giden erke-de,
Bu günki gül, gül bolmakçy erte-de.
Bu günde ýa birigünde däl däni,
Barça kişiň bar umydy ertede.

***
Göwün döne kagyza post-emelde,
Aň bäbegi bilim süýdün emende.
Garamaýak-kembagallar bermese,
Geni berip bilmez özge jemende.

***
Nandan doýan aç goýar nan "ekeni",
Ýykar wezipä çekilen -- çekeni.
Kise boşar baş bilimden "dolanda",
Kise dolsa, kelle boşar ekeni.

***
Synlap görsem, çaý diýýäniň neşe seň,
Synlap görsem, pil diýýäniň peşe seň.
Rowaýatyň-ertekiniň külünden
Hakykatyň çogy çykar peşeseň.

***
Dert tapanyň ölüm düşer ýadyna,
Garrylygyň ajal "ýeter" dadyna...
Gezekli bu barlykda jan, ýaş, ömür,
Bar zat şärik durmuşyň bar zadyna.

***
Dindar bilmez ýaşamagyň geňdigin,
Jeňbaz bilmez ajalynyň jeňdigin.
Hemmä deňlik ýeten gonamçylykda,
Heýkel diken bozar ölmüň deňligin.

***
Läläm, huşum ýitdi, özüň tapmasaň.
Başym ýeke, başyma baş sapmasaň.
Yşkyň urup, bolupdyryn zyr-däli,
Özüňdäki "dälihana" gapmasaň.

***
Nebs hazany öwsüp akyl solmazmy,
Galplyk ýeli ar gülüňi ýolmazmy?
Öljek bolýaň nesliň üçin zat ýygnap,
Nesliňde el hünär kelle bolmazmy?

***
Köli -- derýa, derýany çaý-sil dograr.
Hasyly -- ýer, ýeri kätmen-pil dograr.
Akyl -- ylmy, ylym dograr akyly,
Ýolbaşçyny döwür, durmuş, il dograr.

***
Her gün yşka öldürdeňden tas meni,
Gowusy, ýar, saç taryňdan as meni.
Ýaňagyňda agzym etdi jenaýat,
Ýüz ýyl goýnuň "türmesine" bas meni.

***
Horlama, gyz, çaky bar näz-oýnuň-da!
Men betbagty bagtly etmek boýnuňda.
Şum gojalyk gara berýär uzakdan,
Oňa bermän, gizle meni goýnuňda!

***
Seni görüp boldy çalam-çaş ýürek,
Bir bäri bak, bolmasa-na daş ýürek!
Gezelip dur gabagyňdan naýzalar,
Bar hersiniň ujunda bir ýaş ýürek.

***
Uzyn saçyň ilki boldy geregim,
Şoň üçindi sowgat beren daragym.
Ýüregim-de örüpdiň saç öreňde,
Saçyň bile bile kesdiň ýüregim.

***
Deňlik gözlär başyna yşk daradan,
Tapman ony hiç ýer, hiç edaradan.
Deňlik bolsa tebigata ýatmyşyn,
Oňa ýetip bormuş, çyksaň aradan.

***
Ýaşamaýyn -- ýaşamasam ner bolup,
Ýaşamaýyn -- ýaşanymdan şer bolup.
Jan beremsoň ýaşajagym belli däl,
Ýöne belli ýaşajagym ýer bolup.

***
Göwnüm -- yşky köje döwýän sokudyr,
Sen -- yşky aş, özge onuň ýokudyr.
Gülüm, sensiň aýlap duran ömrümi,
Inçe biliň -- jan şarymyň okudyr.

***
Ýadyňdamy, biz ekipdik bu taly?
Gel, teýinde yşk oýnaly,-utaly?
Bagtyň özi gelmez, ýörsek garaşyp,
Gaçgak bagty goýna gabap salaly!

PAÝZY ORAZ