Ömür hasabyndan gädip bir ýaşy,
Gör, ýene dünýäme gyş geldi eje.
Hyýalbent arzuwlam, sowaşan duýgym,
Kalbymyñ gapysyn kakyp dur gije .

Başarsam daş durup iren duýgymdan,
Gyşyñ gary deýin sowaşjak bolýan.
Şygrym bilen ýyldyp üşän kalbymy,
Ownuk dertler bilen oñuşjak bolýan.

Eje, ýylat meni mähriñe çoýda,
Duýaýyn päk kalbyñ bahar ýazyny.
Şonda ejizletmez sowuk nazaram,
Gyşyñ añzagynda doglan gyzyñy.

Ejizlige hötde gelsin mertligim,
Arzuwlarma tarap sen meni tije,
Täze dogan güne ýaýyp aklygy,
Gör ýene dünýäme gyş geldi eje

Dursun MYRADOWA