Söýginiň gözlenişi

Kän görsem-de gözel-gözel adamy,
Belki görmedim men daşdanam boýuň.
Bilmesek-de kimdigiňi, adyňy,
Eýýäm bezäp goýduk ýaşajak öýüň.
Dostumyň salgyndan seni gözleýän,
Alysdan, alnymdan seni gözleýän.

Bu gözel dünýäniň gözel ýerinde,
Bilýärin, gezýärsiň sen meni gözläp.
Biriniň bakyşy syrly göründe,
Gozgalaň tapýansyň gyzlardan gizläp,
Menem ilden gizläp saňa garaşýan,
Menem gözläp-gözläp saňa garaşýan.

Gaýnyňam aýap ýör gowja zatlary,
Diýip: “Sowgat bolar gelnime, guzym”
Näbelli gyz bilemizok razmeriň,
Belki, dar, gysga bor, belki-de uzyn.
Enem saňa diýýär: “Şol meniň ertäm”
Enemiň ertesi haçan gelerkäň.

Gelsene aýlardan, ýyllardan aşyp,
Ýyllar seni juda haýal getirýär.
Gel, bu ojak saňa ozaldan aşyk,
Onda saňa duş gelmedik mähir bar.
Geljegim seň bilen bile gelmeli,
Gel gyz, sen barybir bize gelmeli.

Italmaz Akmyradow

HYÝAL

Garaldy gögüň ýüzi,
Ýyldyzlar göz gypyşdy.
Gündiz uklan arzuwlar,
Ine, ýene tapyşdy.

Ýürek köräp ugrady
Ýar jemalyn küýseýip.
(Wah, şu meniň söýgimem
Öňem agyr güýze ýük.)

Sanalgyja minutdan
Bellenilen duşuşyk
wagty bolar,
Ýürekler
karar tapar duşuşyp.

Häzir men deý serwimem
Aýna bakyp durandyr,
Aýa bakyp durandyr.
Äwmezek diwar sagat
Için ýakyp durandyr.

...Kän garaşdym ýoluna,
Gije daňa geçişdi.
Kalpda dörän höwesler,
Ine, ýene öçüşdi.

Ýene-de agşam düşer,
Garaşaryn men ýene.
Her gün,
her gün garaşýan,
Maral gözlim, gelsene!

Sapa Hommadow

Garaşmak

Sen gitdiň, giň dünýäm daraldy meniň,
Öz äkiden şatlygyňy alyp gel.
Gaşlaryňy çytman, kalbyňa gülüm,
Diňe täsin umytlary salyp gel.

Ýola çyksaň belent arzuwlar bile,
Öýkedir-kinäni sowurgyn ýele,
Açylan bägüle meňzäp sen ýene,
Meni bilbil saýyp, oýnap-gülüp gel.

Sen şeýle jadyly, şeýle zyýada,
Meni kä doňdurýaň, kä salýaň oda.
Eger bagtsyz bolmazlygmy dünýäde
Isleseň öz zerurlygyň bilip gel.

Duýar bolsaň, kändir yşkyň öwrümi.
Haýyr-şerden ýasalandyr her güni.
Bir öçügsi ýyldyz däl-de, ömrümi
Nur bilen bezejek Günüm bolup gel.

Olam başartmasa... Tapman alaç men,
Örtenip galsam-da, bil senden geçmen.
Görsem bes!.. Dert bolup gapymy aç sen,
Ezraýylyň mukamyny çalyp gel.

Italmaz Nuryýew

Garaşmak

Bolmaz eken syryň gizläp,
Güýzler don geýende zerbap.
Ýürejigmiň bir zat, bir zat
syzýan ýerinde garaşýan.

Ýollar saçyň deý çözlene,
Geldim müň derde döz gele.
Ýazgydymy bir söz bile
ýazan ýeriňde garaşýan.

Bilmen, oýnumy ykbalyň –
Alnymdan gülüp çykmanyň...
Aşyk Perhadyň yşk dagyn
gazan ýerinde garaşýan.

Ömürm – dünýäňe saparym.
Sende ýitiren-tapanym...
Umydyň soňky sapagyn
üzen ýerinde garaşýan.

Didäňden didar ýetişe,
Uçgun ot boldy tutaşa.
Soňsuz heseri bu başa
dözen ýeriňde garaşýan.

Dünýäm elendi dowluňda,
Söýgi kemendi boýnumda.
Ah, ömrüň ýeser oýnunda
jyzan ýeriňde garaşýan.

Diýsem herne göwnümdäkin,
Sensiz gün geçirme nä kyn...
Ala gözleň täsin-täsin
süzen ýeriňde garaşýan.

Kakamyrat Rejepow

Garaşmak

Men saňa garaşýan garaşyp ýörün.
M. Gurbanow.

Garaşýaryn saňa, garaşyp ýörün,
Gelseň bolýa, garaşaýyn ertirem,
Kime garaşýanym bilmedik bolup,
Geçip gitdi anha seniň eltiňem.

Garaşýaryn, garaşaryn bu günem,
Gözläp garaşmagyň täze tizligin,
"Garasgyn" diýeňsoň sen ulygyzkaň ,
"Ýetdirmän ýelginne umytsyzlygyň ".

Her gün garaşýanym bir ýer bolansoň,
Öwrenşipdir ýaşaýjylaň hemmesem,
Çiňerilip geçip gidýär kä mahal,
Syr alyp berişýän joraň ýeňňesem.

Garaşýaryn geljek diýen ýeriňde,
Bilsem-de gelipler bilmejegiňem,
Her göremde halyň sorajak welin,
Indi ýüz berenok şol gelnejeňem.

Hiç zatdan habarsyz erkek doganyň,
Gabatlaşsak salamlaşýar baş atyp,
Gelmeýärsiň gelip guran günlerde,
Bilmeýärin diňe saňa sataşyp.

Allanazar Rejebow

Gowy ýazylypdyr

Juma şahyr, hakyky şahyrlar, hakyky goşgular bar bulañ içinde. Okap öwrenibermeli.

GARAŞÝAN 

Men saňa garaşýan, garaşyp ýörün, 
Ertirem garaşjak şu günki ýaly, 
Käte garaşýarkak biweç zatlara, 
Dünýäm, heý saňa-da garaşman bormy?! 

Garaşmakdan gaýry alajyň näme, 
Gerek bolsa bökersiňem garaşman. 
Men şu günler ürç edinip öwrenýän, 
Täze-täze usullaryny garaşmaň. 

Oturyp garaşmak düşse ýürege, 
Ýatyp garaşmaly, umytdan düşmän. 
Owal-ahyr maksadyna ýetýändir, 
Garaşmaň üstünde ymykly işlän. 

Garaşaýyn saňa ýene az salym, 
Bolmasa, ýene-de garaşaýaryn. 
Garaşmakdan ýaňa nädäýersiňiz, 
Haýrana goýaýsam bütin Ýer şaryn. 

Men saňa garaşjak, garaşyp bolup, 
Ýene-de garaşjak, bu meniň kärim. 
Bir gün-ä gelersiň, gelersiň çünki, 
Men saňa garaşýan, garaşyp ýörün. 

Myrat Gurbanow

Garaşmak

Iki dünýe arasynda kösenip, 
Ýola düşen umytlarym derdeser. 
Kä halatlar içim tutup gülmelem, 
Belki ýanan ýüregimiň derdidir.

Eýýam ençe aýlap çykamok ile, 
Synan göwnüm hoş sözüňe intizar.
A sen bolsa, diýýäň ýygralyk bilen. 
«Garaş, saňa aýdylmadyk sözlem bar!».

Alasarmyk düýşden bilmän oýanyp,
Ýaşamagyň derdi bolaýsa-da kän. 
Sen bilýäň-ä onki süňňüm hem ruhum,
Soňsuz synaglarda taplanyp bekän.

Onsaň senem dymýaň müýnüň bar ýaly,
Ömrüň tanapyndan çekeläp käte. 
Wah, diňe birine baglyka köňlüm, 
Dünýäň şowhunyndan bolýan dokmäde.

Ah, ýaşamak barýar uly bagt bolup, 
Ýogsa durmuş öňküligne akyp dur. 
Kalpda çeken suratyňy sypalap, 
Nemli gözlem ýollaryňa bakyp dur.

Gunça Amansahedowa

Saňa garaşýan 

Gijeler oturyp, çekip kän şöwür, 
Süýt deý saba-säher, daňa garaşýan. 
Bagrymy eredip, 
Döredip şygyr, 
Söýginiň ýolunda saňa garaşýan. 

Sensiz geçýän günler gitsede uzap, 
Garaşmakdan kalba ýetsede azap, 
Gel, ýaşamak üçin kalbymy bezäp, 
Söýginiň ýolunda saňa garaşýan. 

Adyňy ezizläp ýürekde-serde, 
Aýralyk kalbymy goýsada derde, 
Gözlerim ýoluňda, şol öňki ýerde- 
Söýginiň ýolunda saňa garaşýan. 

Daň sazyn çalanda, taryny kakyp, 
Gün göge galanda, nuryny döküp, 
Aýak yzlaryňa bägüller ekip, 
Söýginiň ýolunda saňa garaşýan. 

Sylapberdi Muhamow

NIREDE SEN HUMAÝ GUŞUM?!

Soradym men gülgün ýazdan-eý, näzenin gözel ýaz!
Gördüñmi meñ humaý guşum, nirede eder perwaz? -

Bahar jogap berdi maña göterip, agras başyn:
"Gördüm ony hol daglarda otyr, galdyrman başyn.

Hawa, başyn galdyranok, boýny bükülip gamdan,
Sora ony, ide ony şol howaýy daglardan."

Assa-ýuwaş rowan bolup, beýik daglara tarap,
Soradym göwün guşumy, dagyñ gerşine baryp.

"Uçdy-gitdi baglara, señ mähriñi beren guşuñ
Sora ony baglardan" diýdi, dag, galdyrman başyn.

Ädim ädip, reñbereñ gözel gülleñ ojagyna,
Atdym özüm, ajap baglañ erem mysal gujagyna.

- Eý, behiştden zemine gelip düşen al güller,
Gördüñizmi zyba guşum, aýdyñ, şeýda bilbiller! -

"Ganat kakyp, sähralara uçdy señ zyba guşuñ"
Diýdi baglar, hossarym dek sylyp gözümiñ ýaşyn.

Soñky demde daljygyp, sährañ goýnuna ýetdim.
Boýnum burup, naçar garap, arzymy beýan etdim.

- Eziz sähräm, ene sähräm soñky umydym sensiñ,
Aýt ahyry, nirelerde ol bagt guşum meniñ! -

Şuwlap geldi gaşyma sährañ ilçisi - şemal,
"Gözýetimden alyslarda galypdyr ol nur-jemal"

Diýdi, göwün örkümi üzen habaryn berip,
Bagtym ýitdi gözýetimde, galdym elimi serip.

Şondan bäri hem, jahanda her gün--gün dogup ýaşýar,
A men bolsa, gözýetimiñ çakylygna garaşýan...

Ogultäç Nazarowa

Bagt

Edepli gyz duşuşyga giç gelýär,
Garaşdyryp sabryň soňuna çenli,
Eý, katdy-kamatyn küýseden bagtym,
Sen juda edepli bolmaga çemli.

Giç açylýar hoşboý ysly bägüller,
Kemsiz ganyp tylla günüň nurundan.
Bir gün beýhuş eder öýdüp ysyna,
Ynamyma beýhuş bolup ýörün men.

Dolan aý giç dogýar,
giç dogýar çenden,
Gijäni ýagtyldyp gündiz ýaly ol.
Garaşaryn, bagtym, mümkin däle çen,
Ýöne ýarym-ýalta däl-de, doly gel.

Özgäniň bagtyýar aýdymyn aýdyp,
Garaşýan, men saňa garaşýan, bagtym.
Sen gelersiň, ýöne, ynan, gorkýaryn,
Gersiň öýdüp, bagta mätäç däl wagtym.

Nobatguly Rejepow

Geñlemesin göwnüñ duýdurman bize
Ýyllar deñämizden geçende ýel dek.
Bir gün sataşarys.
Şol güne çenli
Diñe sabyr bilen garaşmak gerek.

Mahym Nurgeldiýewa.

Penjirä iñ gowy gelişýän kişi, garaşýan kişidir.

anonim

Tuweleme gelnin gadryny biljek oglanlar óñki shahyrlar eken.Indi olar yaly oglanlar ikiyeke

Ajaýyp, aý beýem diýiberme, şahyryñkam diñe sözde bolýandyr )

Ýetireniñize minnetdar. Kopiýaladym.

Belki,
Bolyala bilyanem bolsañyz((

Ne hasta bekler sabahı,
Ne taze ölüyü mezar.
Ne de şeytan, bir günahı,
Seni beklediğim kadar.

Ne syrkaw garaşar ertire,
Ne-de täze ölä mazar.
Ne-de şeýtan bir günäniñ-
Saña garaşyşym ýaly,
Ýoluna bakmaz intizar.

Nejip Fazyl
terjime:kesirkelle

Ogulnur Ataÿewa / Garašdym


Günleň biri elden gaçan käse deý,
Taýyp gitdiň, sabyr käsäm moý açdy.
Gör, nije ýyl «dymp» etmedik ýüregim
Edil şu gün jibir-jibir dil açdy,
…Iller ýaly diýmeseň-de: «Garaşgyn»
…Garaşdym.

Men göze ilen bir nowjuwan gyz ahyr,
Aladadym enem bilen atama,
Guda gelse ýer tapamok girere,
Gatnaýanlar köpelipdi ak tama,
Aňsalaram, aldamaga çalyşdym,
…Garaşdym.

Kese bakýan kesip geçjek ýoluňa,
Iliň gözi maňa göni dikilýär,
Sen dünýäni ýumrup gitdiň başyma,
Göz kän, dil kän…
şu zatlardan çekinýän.
Halyň niçik, daşgulakdan soraşdym,
…Garaşdym.

Mende bir dert, sende-de müň alada,
Derdim ýeňletmäge käte gel ahyr.
Meni ýüpsüz aýralyga saradyň,
Dartyberseň, kertiberer teý ahyr,
Ynanýaňmy, men hiç kime garaşsyz
Garaşdym.

Kämahallar ýyllap duşman oňarsyň,
Maýam dörär käte kowup-gaçara,
Derdim çekişeňok, asyl özüň dert,
Sen hossar däl, saňa syrym açara
Men bu gije ejem bilen aglaşdym,
…Garaşdym.