Süýji düýşde ýatyrdym men irkilip ,
Sagadyň sesine turdum tisginip .

Sagada seretdim ýedi bolupdyr ,
Zöwwe turdum işden gijä galypdyryn .

Soňra howulhara eşigmi geýdim ,
Ýene howulhara naharmy iýdim .

Ylgap çykdym köçä balagmy çekip ,
Iligem ilmän dur içiňi ýakyp .

Hanha awtobusam geçip barýar-laý ,
-Saklanaý azajyk uçup barýaňaý.

-Bar uçsaň uçyber taksiler gyt däl,
Seň yzyňdan ylgap men beýle it däl.

Günde geçip gidýäň görmediksiräp ,
Menem galýan şeýdip yzyňdan garap.

Ine, ýene şeýdip taksa garaşdym
Taksilerem gelmän geçýär garaşsaň.

Yzyma seretdim awtobus bar-a,
Aňyrrakda maňa garaşyp dur-a.

Awtobusa tarap ylgadym ýene ,
Zordan awtobusa ýetişdim ine.

Şafýor diýýär:
-Geldä , gelmän geçýäňaý,
Menem diýýän
-Günde görmän geçýäňaý.

Ýene biri diýdi:
-Gelesi gelmez,
Taksa münýän muňa münesi gelmez .

Oňa zat diýmedim ýylgyrdym diňe ,
Durup,durup,durup ,geldim işime

Igenjeň sekretar dur-a öňümde
Nädip geçip gitjek onuň deňinden ?

Salamym bermänkäm igenip başlar ,
Her gün gaýtalanýar mende bu işler.

-Günde işden şeýdip galýarsyň gijä,
-Neme...Bagyşlarsyň Suraý gelneje .

-Bagyşlap, bagyşlap , bagş galmady,
Sekiz boldy geler ýerde gelmediň.

-Bilgeşleýin etýän ony bilýärin ,
Nädip günde gijä galyp bilýärsiň.

-Düşündirşiň ýazda başlyga iber ,
Özüň girip gürleş , başlygam geler.

-Bolýa -bolýa -diýip geçdim men ahyr ,
Gör göwünlik berýär işdeşim Tahyr .

-Gaýrat etdä Gerçek bizdenem geçer,
Bularyň sözlerne bar keýpiň gaçar.

-Gaýrat edip gaýrat gutarar haçan?
Gutarman geçdiläý gutarman geçen.

Soň ýene-de geldi şerraý sekretar,
-Geldä Gerçek saňa başlyk garaşýar.

-Ýogsada ýazdyňmy düşündürşiňi ,
-Aý entegä ýazaýamok men ony.

-Şu wagta çen nämişlediň ? Ýazda bol,
Sag aman ýazda elt , özi çeker gol.

Ýazdym,boldum , bardym, açyldy işik,
Çişik başlyk otyr kürsüde çişip.

-Salam başlyk , arma , ýagdaýlar neneň?!
-Salam , çaltyrak aýt nämüçin geldiň?

-Neme...işden biraz gijä galdym-da,
-Günde şeýdýäň men-ä senden irdimdä .

-Sakalňam ösüpdir ,syraňokmy ýa ,
Sakal syrmanada wagtyň ýokmy ýa ?

-Saçyňada seret egne düşdile,
Meňzejek bolýaňmy ýa-da Puşkine .

-Bolýar,bolýar , başlyk bolýar düzetjek,
Işden çykyp saç-sakalma seretjek.

-Borlaý gaýtalama indiki gezek ,
Menem saklap dursuňa sen biderek .

Çykdym,geldim ýerme hatlar gaýyşyp,
Ýatyra bulaşyp,maňa garaşyp.

-Aýdaý işdeş işler gutarar haçan ?
Gutarman geçdilaý gutarman geçen.

                       *     *    *

Ahyry gutardy gutarman geçen,
Öýe geldim zordan ysgynym gaçan.

Öýüňe gelseňem gutarmaz işiň ,
Ýene hat-petekler ýatandyr üýşüp.

Bir ýanyňdan nahar, bir ýandan gahar ,
Blä ýatdan çykdy syrmaly sakal.

Saçam deňletmeli , näme etmeli?
Näm edersiň dellekhana gitmeli .

Bardym, gördüm , bäýbä kän garaşmaly ,
Soň ondanam gelip suwa düşmeli .

Aýal,çaga,eklenç,resminama,iş,
Dükana barmaly wah gidipdir huş.

Gör onam etmeli, munam etmeli ,
Şeýdip zordan ýassygyňa ýetmeli.

Süýji düýşde ýatyrdym men irkilip ,
Sagadyň sesine turdum tisginip .

Sagada seretdim ýedi bolupdyr ,
Zöwwe turdum işden gijä galypdyryn .

Soňra howulhara eşigmi geýdim ,
Ýene howulhara naharmy iýdim .

Ylgap çykdym köçä balagmy çekip ,
Iligem ilmän dur içiňi ýakyp ...

Näçe ylgasamda gutarmaz işim ,
Şeýle dowam edýär meniň durmuşym .

*     *    *

Ýene şükür edýän men öz günüme ,
Aňsat , haram işler gitsin gümüne .

Halalja gazanjym meniň bar genjim,
Maşgalam- baş galam , arkadaýanjym.

Erkana ýaşaýan erkana ýurtda ,
Şeýle ýaşamagam iň uly bagtda .

Saglygym-baýlygym,ýeter aýlygym,
Gerek däl-ä beýle artyk baýlygam.

Goşgym göwün hoşym, ýar ýürekdeşim,
Şeýle dowam etsen meniň durmuşym .

(Soňy)

(15.02.2023)

Gerçeknazar Amannazarow