Hyýal

Gabat geldim seýilgähleň birinde,
Şahyr eken, goşgusyn ýazyp otyr.
Haýsy gözel barka onuň serinde,
Ol bolsa ser bermän, şo-ol ýazyp otyr.

Arzuwlanym meniň türkmen ýigidi,
Şol şahyra mende söýgi döredi,
Kalbymdaky garlaň bary eredi,
Ol bolsa ýeň bermän, şo-ol ýazyp otyr.

Geçdip eýläk-beýläk onuň deňinden,
Has görmegeý eken çaky-çenimden,
Menem-ä gelerin seniň emiňden,
Ol bolsa syr bermän, şo-ol ýazyp otyr.

Ahyry çydaman söz gatdym oňa,
"Arma-da, şahyr, menden salam saňa!"
Baş galdyrman jogap berdi salama,
Ýene-de şol bir zat, şo-ol ýazyp otyr.

Yzyma öwrülip ýöräp başladym,
Şahyr hakda pikirlermi taşladym...
Birden oýandym-da, agyr haşladym,
... Hyýalymda welin ... ol ýazyp otyr.

Aýgül Ýazweliýewa