- Munuñ diş däl-ä, äñiñ süñki!
Häliden bäri sogurlan dişimiñ töwereginde abzallaryny gezdirip duran lukmanyñ sözleri geñirgendirdi.
- O nähili?
- Äñiñde süñk bolýar-a. Kellebaşaýak iýip gördüñmi?
- Ýok. Iýemog-a.
- Iýmedik bolsañ şu gün kellebaşaýak iýýäñ.
- Ine bar-a diş - diýip, sogurlan ýerimdäki gaty ak zady barmagym bilen görkezjek boldum.
Lukmanyñ ýüregi ýaryldy.
- A gyz, aýyr barmagyñy. Kirli barmaklaryny agzyna sokýarlar onsoñ bitenok sogurlan ýeri.
Degişgen lukmanyñ sözlerine dişim ikilenç sogurlanda meni ýeke goýmazlyk üçin ýanym bilen gelen ejem hezil edip güldi.
Lukmana gülki ýaramady.
- Hakyky zat-da.
...Diş lukmanyñ kabinetinden çykan ejem daşynda nobatyna garaşyp duran näsaglara ýagdaý barada "düşündiriş geçmegi" ünsden düşürmedi:
- Diş galmandyr. Kellebaşaýak iý diýýä...
Ejem töwerekdäki daşgynrak garyndaşlarymyza sowulmak islänligi üçin ýeke gaýtmaly boldum. Öýe barýan ýolumda adatça goñşy obanyñ mekdebiniñ içinden geçýärdim. Synplaryñ penjireleriniñ ählisi açyk ýagdaýdady. Içerde sapak geçýän mugallymlaryñ janygyp tema düşündirýänini eşdip, sakga durdum. Töwerekde "gizlin hereketimi" görýänleriñ ýoklugyna düşünenimden soñ az salym eglenip sapagy diñledim. Mugallymçylyk käri hakda oýladym. Meniñ bilen deñ ugurdan uçurym bolup, mekdepde mugallym bolup ýören işdeşlerim bardy. Hatda, şu ýylam bir işdeşim mugallymçylyga geçipdi. Bulam mahal-mahal meniñem mugallymçylyk hakda içgin oýlanmagyma getirýärdi. Her gezegem terbiýeçilik gözüme has eziz görünýärdi...
...Öýe tarap assa ädimläp barşyma lukmanyñ hälki sözleri serimde aýlanýardy. "Diş däl, äñiñ süñki".
Meniñ bir hepde bäri diş diýip uly ile aýdyp ýören zadym äñiñ süñki bolsa nätjek?! Bir tarapdan ýalñyşandygyma gynanýardym, beýleki bir tarapdan ýene şol agyra döz gelmeli bolmajakdygyma begenýärdim.
Ýalñyzlygym we bagtsyzlygym sebäpli çekýän yzalarym ýadyma düşdi. Men olaram edil diş meselesindäki ýaly giperbolalaşdyrýan bolaýmaýyn?! Gulagyma gaýypdan bir ýerlerden çawuş çakylan ýaly boldy:
" Onyñ bagtsyzlyk däl-ä, synalmak".