Iki oýunda 187 gol geçirildi
2022-07-06
Afrika yklymyndan futbol baradaky täsin habarlar gelmegini dowam edýär. Mundan sähelçe wagt ozal Günorta Afrikada käbir klublaryň galplyga ýol berendigi zerarly şol toparlar ömürlik futboldan çetleşdirilipdi. Ýene-de şoňa meňzeş habarlaryň biri Sierra Leoneden gelip gowuşdy. Bu gezekki hasaplar futbolyň taryhynda görlüp-eşidilmedik netijeler bolup, öňki uly hasaply ýeňişler bu hasaplaryň ýanynda deňizde damja deýin galýar. Ýurduň dowam edýän 1-nji ligasynda geçen ýekşenbe güni oýnalan 2 duşuşykda 187 gol geçirildi. Basketbol oýnuna dönen bu duşuşyklarda “Kahunla Reýnjers” öz meýdançasynda “Lumbebu Ýunaýtedi” 95-0, “Gulf FK” bolsa “Kokima Lebanony” 91-1 hasabynda ýeňdi. Iň köp gol geçiren toparyň ýokary liga, ýagny “Super Lige”çykarýan bu iki duşuşygyň 1-nji ýarymlary degişlilikde 2-0 we 7-1 hasaplar bilen tamamlandy. “Kahunla Reýnjersiň” “Lumbebu Ýunaýtedi” 95-0 ýeňen duşuşygy ýurduň taryhyndaky iň uly hasaply ýeňiş hökmünde bellense-de, federasiýa tarapyndan 2 oýnuň netijesi hem şübheli ýagdaýlar sebäpli hasaba alynmady. Häzirki wagtda derňewler ýokary depginde dowam edip, galplyk ýüze çykarylan ýagdaýynda jogapkärlere agyr jerimeleriň salynjakdygyny federasiýanyň başlygy Tomas Deddi Bruma aýtdy.
Zaman gazeti.