Sen ol kişi dälsiň,
Meniň gözlänim.
Ýitirmekden wehm eýlänim sen dälsiň.
Gije düýşde samrap gündiz sözlänim,
Hossaň ýeke zerresine dözmänim,
Serde hallan atyp, oýy-pikiri,
Akyl çözläp, pähm eýlänim sen dälsiň.

Sen ol kişi dälsiň,
Ýagmyryň oklan.
Damjasynda husny-roýun gördügim.
Arzuw deý göwünde tijänim dälsiň.
Köňülde köşk gurup, patyşa saýyp,
Azabyna "lepbeý" diýip ýördügim,
Mährine suwsanym, ymgyr çöllükde
Ykmanda şemaldan idänim dälsiň.

Howwa, synanmagam bir üstünlikdir,
Gyýylaýma, galanyňa çenenip,
Seret, älemgoşar doguldy gökde,
Şoldur meniň oňa baglan çemenim.

Baş heserde,
Göwün otda,
Ruh yşkda,
Başagaý dünýämde meň etsemim kän,
Durnadan gönderen salamlarymyň,
Gowuşmaly ýeri seň mesgeniň däl.

Sen ol kişi dälsiň,
Meniň gözlänim.
Eýmenen gözlermiň eýesi sen däl,
Otdan alyp, suwa salyp örtänim,
Ýüregiň boz meýdanynda örklänim,
Syrdam umydymyň seresi sen däl.

Bir gün şindikiden has çuň söýersiň,
Öten barmy yşk toruna çolaşman.
Men onuň geljegin güman edýärin,
Ýüzüp ýörün hyýal deňzin gulaçlap.
Adamda-da ýowuz, elhenç gylyk bar,
Gelmejege has intizar garaşýar.

Sen ol kişi dälsiň,
Nazaryň sepip,
Takrap ýatan köňle ham-hyýal eken.
Durmuş pelsepesi nakyldanam çuň:
Munda her agtaran tapmaýan eken.

Mahym NURGELDIÝEWA.