Senä ulugyzdyň zülpleri towly,
Men hem bir maşgalaň körpeje ogly.

Menä söýýän diýip saýran bolardym,
Sen hem monça bolup aýnan bolardyň.

Hemişe gizlenip göz bilen dilden,
Bileje ýörärdik gumaksy ýoldan.

Ir säherden baryp atyzly pele,
Ak pagta ýygardyk ikimiz bile.

Köp sorag bererdim sebäp uludyň,
Gül ülkämde gözelleriñ gülüdiň.

Degişip diýerdiň: bahym ýigit bolarsyñ,
Öýlenmekçi bolsañ meni alarmyň?

Kyndy bu sowalyň jogap tapardan,
Oýlaýanym görüp gözüñ gypardyñ.

Köp pikir ederdim bolup haly teň,
Diýerdiň: jogap berä sowalyma meň.

Jady gözleň aşygy men aşygy,
Ýöne neýleý çapraz gelen ýaşymy.

Taýyn baky öwrülmäge guluňa,
Arman läläm ýaşyň menden uly-da.

Men ýigit çykýançam ynanaý gülüm,
Sen bolarsyň ençe çagaly gelin.

Soň hem diýdiň: ömrümiň ahyrna çen
Garaşaýjak meni aljagňy bilsem.

Emma bu durmuşda etsegem göwün,
Hasyl bolaýanok ähli arzuwyň.

Käte söýen söýmedige çatylýar,
Ykbal aty bizden bidin çapylýar.

Aýra düşsek hergiz göwnüň galmasyn,
Bir dilegim güler ýüzüň solmasyn.

Ömür salyň şat durmuşda kürekle,
Soň söýgimizi sakla baky ýürekde.

Şeýdip bezediň sen özgäň törüni,
Soň asla görmedik birek biregi.

Birwagt öwrülipdiň göwün şadyma,
Şindilerem düşüp dursuň ýadyma.

Menä bir maşgalaň körpeje ogly,
Senem ulugyzdyň zülpleri towly.