Ukrainanyň prezidenti Wladimir Zelenskiý Donetsk sebitiniň Awdiýewka şäherine geldi we ukrain goşunlarynyň öň hatarlaryndaky nokatlaryna baryp gördi diýip, Ukrainanyň prezidentiniň ofisi habar berýär.
Zelenskiý Donetsk taktiki-operasiýalar toparynyň serkerdesiniň hasabatyny diňledi, harby deňiz güýçleriniň gury ýer topary, harby hüjüm desanturasy, mehanizasiýa we artilleriýa bölümleri bilen söhbetdeş boldy we döwlet baýraklaryny gowşurdy.
"Şu gün şu ýerde siziň araňyzda bolmagy özüme uly mertebe saýýan, size Ukrain topragyny, onuň bitewiligini, maşgala-ojaklarymyzyň abadançylygyny goramakda alyp barýan gaýduwsyz hereketleriňiz üçin köp sag bolsun aýdýaryn. Sizi Pasha baýramçylygyňyz bilen gutlaýaryn we ýeňişi, biziň hemmämiz üçin, her bir ukrainaly üçin möhüm bolan ýeňişi arzuw edýärin" diýip, Zelenskiý harbylar bilen duşuşygynda aýtdy.