Göwnüm gitmez göwnüň ýetmez işlere,
Paýhasym ýoluňy tutar her haçan.
Yhlasym birigip umytlam bilen,
Seň ugruňda zähmet çeker, der saçar.

Amal etmen ýersiz-ýerde gögerip,
Boý almaga yhlas edýän kinäňe.
Sende barmy, ýokmy — on-a biljek däl,
Ýöne gamly günüň hoş söz diýmäge
döwtalap men.
Mende juda-juda kän
Şeýle niýet.
Şeýle päliň biri men.
Ýüregiňden bireýýämler göç eden
Ýagşy arzuw,
Saňa köňlün bagş edip,
Ýalňyz çagy sanda däliň biri men.


Sapa Hommadow

Böwürlerne sanjy bolup gijeleñ,
Kä surnugyp, kä ÿerliksiz tijenen,
Setirlere sygyp bilmän güÿjelen
Däli duÿgularmyñ eÿesi senmi?
Ÿykdym-ÿykyldymyñ söÿesi senmi?

Müñ gaÿtalap gezer ÿaly adyñy
Ÿa señ adyñ özi maña jadymy?!
Bašga zatdan mahrum edip ÿadymy,
Göwnümiñ iñ süÿji görgüsi senmi?
Hiç üzüp bolmaÿan bergisi senmi?

Adam tapman duÿgularmy añara,
Gošgularmy okap berdim daglara.
Sen bir indi gaÿdyp meni aldama!
Gör, señ näçe gezek gidesiñ geldi!
Gitmediñ.
Ÿa señem gijeleñ menmi?

Sen — derdimmiñ, wagt bejerip bilmeÿän?
Sen berdiñmi ol mukamy — diñmeÿän?
Heÿ, gördüñmi men deÿ takat bilmeÿän?!
Ÿa šol takatlarmyñ ogrusy senmi?
Ömrümiñ ÿalñyšy-dogrusy senmi?

Saña dušup: bilmen, näme — rahatlyk!
Ÿüzün tutup, aglap otyr sagatjyk!
Sagatlar nä!
Aÿ-günleri aglatdyk!
Ömrümiñ ykbaldan algysy senmi?
Ymtylan sa:lgymnyñ salgysy senmi?

Öÿkeläp bilemok,
Bilemok aldap,
Ökünip bilemok, kalbymy daglap —
Galanja günlermem adyña baglap,
Umytda, arzuwda gitjegim belli...
...Gulagym šyñlaÿar:
Ÿatlaÿan senmi?..

Çary Ataýew

Her kimiň öz dünýäsi bar dünýäde
(Täleýden, kysmatdan, ykbaldan başga),
Parhy ýok: şu günmi, ertir, düýn ýa-da
Sensiz ýaşap bilýänimi bagyşla;
Bagyşla kalbyma, aňyma siňen
Perişde deý durkuň bilen oňýanym —
Gazanmadym, ýüz müň dürli öwsübem,
Birje gezek eden işim oňlanyň.
Tas özümi ýitiripdim ýoluňda,
Tas elden gidipdi kelebiň ujy.
Duýdum: perişde-de galmaz ornuňda,
Özüm bilen deň ýitirsem hyrujy.

Düşün meň düşünip bilmeýänime,
Kesgitlemäň ýokdugyna heserme,
Özüm ýazyp, özüm geňleýänime,
Özüň kürsäp urşuň her bir eserme;
Düşün ahyr: men düşünip bilemok,
Zäherlenýän başga güli ysgasam,
Seň bilenem degşip-gülşüp bilemok —
Artyk sözleň uzynlaram, gysgasam.
Öz-özüme artýan ýigrenjiň ujy
Ýeter öýdüp gorkýan senli dünýäme;
Ol bolsa şeýlebir, şeýlebir süýji —
Meň nähili söýýänimi bilýäň-ä!..

Parhy ýok oň: sogapdamy, günäde —
Her dünýäň öz dünýäsi bar dünýäde…


20.07.2018ý.
Çary Ataýew

Seÿtmyrat Geldiÿew / Ylham böwşeňligi nämeden?

Indi bir aý töweregi telefonymyň bloknot sahypasyna bellän pikirlerimi, ýolugra gelen goşgy bentleriniň diktofon ýazgylaryny, kompýutere ýazyp başlap, taşlan goşgularymy, ýanymda göterýän bloknodymdaky belliklerimi tertibe salýan. 11 goşgy. Ýene şonçarak goşgy üçin taýynlap goýan pikirlem...
3 ýyl mundan ozal biri goşgy ýazmagymy düýbünden taşlamagymy hem netijeliräk bir zada ýapyşmagymy maslahat berdi. Ýöne bir maslahatam däl, ýanjap-ýanjap delil getirdi.
«Mundan öňki şahyrlaň gazanan zady näme? Hana, Gurbannazaram ýazdy, ölüp gitdi. Çary Ýegenmyrat kesel gazandy. Bapbaň düşen gününem bilýäň. Nobatguly Rejebiň döwründe senzura bu wagtky ýaly däldi. Ol diýjegini diýip ýetişdi. Teatrlardan gelýän gonaram ekledi ony.
Ýeri, Magtymguly bolaňda näme. Özüňe, maşgalaňa haýry barmy? Biderek özüňi horlama. Günüň gowy bolanyny bil» diýdi. Men ýylgyrdym-da, başymy ýaýkadym.
Arada şol tanşym gabat geldi. Pikiri üýtgäpdir. Ýazmagy maslahat berdi. Men ýene ýylgyrdym, ýöne baş atyp ýylgyrdym.
Ýazyjylarda, şahyrlarda ylham böwşeňligi bolşy ýaly, edebiýatçylarda, okyjylarda hem edebiýata isleg böwşeňligi bolýar öýdýän.
Aslynda ownuk durmuş meseleleri, söýgi örtenmeleri edebiýata näme goşant goşup biler?
Ýazylýan hekaýalar, goşgular okyjylara näme bermeli?
Ruhy çökgünlik, ýaşaýyşdan ýadawlyk, birsydyrgynlykdan irmek, jogapsyz galýan soraglar adamlarda şeýle-de bar. Olarda agy-da bar, gaýgy-gussada.
Okyja umyt bermek, ony aldamak bolýarmy? Realizm esasynda ýazylýan eserler, durmuşy çeper sözde beýan etmek bolsa, ýazyjy okyja näme berýär? Hany, ýazyjyň ýada şahyryň halka ýol, çykalga salgy berýän pikiri?!
Ýa edebiýat hem ýazyjy-şahyrlar ýaly, edebiýatçylardyr okyjylar ýaly böwrüni diňleýärmikä käte...

Bagt bagt bolar sylynsa ýüze,
Bagt gujak açyp garaşýar bize,
Düwünçekler düwüp täzeden-täze,
Enem toý harydyn alybersinmi,
Baharda sawçylar barybersinmi!?

Gözleriň göwünsiz bakmady herne,
Haýyş, şu päkligiň eliňden berme,
Edil meniň sygman ýörşüm deý dünýä,
Kakam bagtda başyn aýlabersinmi,
Baharda sawçylar barybersinmi!?

Ýaz gelip, gün gonýar üçeklermize,
Ýaz gelip, gül ýagýar ýüreklermize,
Derwezedir diwar-işiklermize
Inim täze reňkler çalybersinmi,
Baharda sawçylar barybersinmi!?

Kalbymdan kalbyňa göçýärkä göçüm,
Durmuşda aýyp däl muň ýaly hüjüm,
Günde ýedi ölçäp, bir kesmek üçin,
Öýmüze myhmanlar ýagybersinmi,
Baharda sawçylar barybersinmi!?

Söýjek seni gelin bolup gelinçäň,
Onsoň söýjek tä jan berip ölinçäm,
Gyz-gelinler toýumyzda geýinjek
Köýneklik matasyn alybersinmi,
Baharda sawçylar barybersinmi!?


Şatlyk HUDAÝNAZAROW

Ooo mlds sag bol bet goşgular.....

ýetirenňize sagboluň

Söz yok!