***
Bu men!
Ak gyşda azaşyp,
Baharyň kalbyndan dömen!
Ýollar ýadadyp azajyk,
Ýene gaýdyp gelen...
Bu men!

Gidişim gidiş bolupdyr,
Yzyma garamandyryn.
Ýene seni gözläp geldim
Goýnuna gara baglaryň.

Ýeke söz ykbal çözýärkä,
Bolma beýle biagyry!
Dymma-da,
ýalandan-çyndan
Bir zat, bir zat diý ahyry!

Ömrümiz goş ýazdyrypdyr
Tez jereniň şahlarynda!
Aýdylmadyk söz
has agyr,
diýlen sözüň ahmyryndan!

Sözüme şübhe ýetişse,
Gözüme dolan ýaşa bak!
Söýgüden dörän ynsana
Haýypdyr söýmän ýaşamak!

Wagtyndan gijigen dürüň
Arzysy arzan bolarmyş.
Bir pursat säginen sözüň
Soň ömre arman bolarmyş.

Guş deý ganat kakýan kalbyň
eşdilýär gursakda sesi.
Neçüýndir, çyr-çytyr bolup
Lebleriň syr saklamasy?!

Ýaý deý ýaýylsyn gaşlaryň,
Gussa çekme, goý ahyňy...
Gözlerime göni garap,
Hany, bir zat diý ahyry!

Kakamyrat REJEBOW.