Gara bulut salyp dünýä gozgalaň,
Bozdy daňlaň düýbün çyzgylan wagtyn.
Giç bolansoň garyp göwnüm gozgadyň,
Menzilin ýitirip azaşan bagtym.

Kakmaryn diýipdiň köňül gapymy,
Hany seniň birmahalky wadalaň?!
Ýegşerip duranja göwräňi synlap,
Synan göwnüm seýik gözlär, ot alar.

Al-asmanda gaýyşyp ýör,
Nädipdir,
Azaşyp jöwzada galan gargalar.
Aýaklam bir gezek ýalňyş ädipdir
ömrüm boýy...
özüm barkam gargalar.

"Gitsem, gelmen" diýip gidipdiň-ä sen,
Gyz kalbymyň arzymany, soltany.
Nirede eglendiň?..
Gelipsiň indem,
Artanda saçlamda aklaryň sany.

Ilki ak saç... Soňam sadap dişlerim
dökülip, artypdyr maňlaýda gasyn.
Nämä geldiň?
Ýene ýazgarmagamy,
ýa-da sowmagamy kalbymyň ýasyn?

Menzilin ýitirip azaşan bagtym,
Gelipsiň mydarsyz göwräňi süýräp.
Ynjap ýörmäň! Razy boluň, arzuwlam,
Göwnüm guba çägä siňipdir çüýräp...


Mähri AÝDOGDYÝEWA