MEKANA

Irde-giçde dolanaryn-a mekana,
Umyt diri, hemişelik gidemok.
Barybir neneňsi garşylanjagym,
Öňümden kim çykjak, gaýgy edemok.

Ýeke gaýgym: kim öňümden çykmajak,
Mert çynaryň ýapraklary soldy-la.
Yzymda galdyryp ýitirenlerim,
Özbaşyna bir öwlüýä boldy-la.

Adalaty ters mündürip eşege,
Hyýanaty ata çykaran Taňry,
Göwnümizi Kap dagyna galdyryp,
Syrtymyzy küle çökeren Taňry,
Iň soňky umydyň inçe sapagny
Bu çekişiň bilen, birden ýolaýma!
Täze dörän pygamberi türkmene,
Dogrudanam, sen iberen bolaýma.

Belki degişýänsiň, aýt, biz güleli
Tüýs janyýananyň gülküsi bilen.
Ýöne indi bes et şir awlamaňy
Niräň bir guýruksyz tilkisi bilen!

Şiraly NURMYRADOW

Çeşme: kitapçy.com