ÝITDILER

Kim aglap ýör ogurladyp malyny,
Kim uwlap ýör gapjygyny ýitirip,
Öwezine bir zat bermeli Taňry
Ýetişenok ähli arzy bitirip.

O biriniň ýel goparýar üçegin,
Beýlekiň hasylyn guraklyk alýar.
Taňrynyň barlygy alynýar şübhä,
Ýa-da, baram bolsa, görmedik bolýar.

Ynsan tebigaty bor eken beýle:
Ýitirse aglaýar, begenýär tapsa.
Özgäň äňi ýazsyn, perwaýyna däl,
Dälirär, özüniň bir dişi gopsa.

Sapy altyn bormuş ýiten pyçagyň,
Eliňdekä Aý bir posly demirmiş.
Ýurdundan kowulyp, watansyz galan
Dişsiz galyp, tirsegini gemirmiş.

Şiraly NURMYRADOW.

Çeşme: kitapçy.com