Gül ýüzüňe ýagyş damjasy düşse,
Didäm, seni şol ýagyşdan gabandym,
Elwan kebelekler daşyňa üýşse,
Aýym, seni şolardanam gabandym.

Mylaýym şemallar saçyň daranda,
Tämiz görküň özgelere ýaranda,
Aşyk gözler seň yzyňdan garanda,
Şol hyrydar bakyşlardan gabandym.

Öňünde oturyp saçlaryň ören,
Syrlaryňy hemmelerden öň bilen,
Günde näçe gezek keşbiňi gören,
Ýüz görülýän aýnadanam gabandym.

Men saňa söýgisiz bakyp bilmerin,
Umyt daragtymy çapyp bilmerin,
Hatda suratyňam öpüp bilmerin,
Ynan, seni özümdenem gabandym.

Takatym ýok, yşkyň indi ýakmasyn,
Gözleň bagtdan dolup özgä bakmasyn,
Men eňräýin, seň göz ýaşlaň akmasyn,
Seň gussaňam özgelerden gabandym.

Ýakdy meni, bir gün ge-r diýen ynanç,
Gursagymy gaplap aldy bir gynanç,
"Söýgide utulsaň, täzeden synanyş",
Men täzesin söýüp bilmän, gabandym.

"Özgä gitseň, keşbiň maňa goýup git,
Ömürbaky söýjekligim duýup git,
Hiç bolmasa bir pursatlyk söýüp git,"
Diýip, seni hemmelerden gabandym,
Seň söýgiňi özgelerden gabandym.


Massimus