Bu gün meni günüme goý, ezizim,
Oňarsaň sen maňa söz gatma asyl.
Ençeme aýlardan, ýyllardan aşyp,
Ýada düşdi öňki ajaýyp pasyl.

Bu gün meni günüme goý, ezizim,
Bu gün menden asyl hiç zat sorama.
Bir zatlar,bir zatlar oňaryn aýdyp,
Gözlerime müňkür bolup garama.

Bu gün meni günüme goý, ezizim,
Maňa sen tarapdan ýetmesin azar.
Süýji sözleriňi ertire goýaý,
Men bu gün bar zatdan, bar zatdan bizar.

Bu gün meni günüme goý, ezizim,
Maňlaýym sypama, tutma elimden.
Ýaşlyk ýatlamasyn yzyna tirkäp,
Ýene başky söýgim çykdy öňümden,
Bu gün meni günüme goý, ezizim!

Bahargül Kerimowa.