Ýazyjylyk — iki prosent talant, togsan sekiz prosent zähmetden ybarat, diýilýän gep dogry bolsa, dünýädäki hemme garynjalar ýazyjy bolardy!

***

Talantsyz ýazyjy towuga meňzeýär. Ujypsyzja ýumurtga dogurýa-da, käkeläp älemi turuzýar!

***

Palta bilen galam bir-birine meňzeýän iş gurallary däl. Emma, bitirýän işleri boýunça meňzeş ýerleri bar.
Palta — Jelladyň elinde ölüm guraly. Odunçyň golunda zähmet guraly. Hünärmendiň golunda sungat guraly.
Galam — bahylyň elinde ölüm guraly. Sowatlyň elinde zähmet guraly. Nakgaşyň elinde sungat guraly.

***

Ynsan organizminiň geň-taňsy hususyýetleri bar: sag goluňyz agyrsa, çep goluňyz ezýet çekmeýär. Çep aýagyňyza ýara çyksa, sag aýagyňyz agyrmaýar. Emma, sag gözi gülýän adamyň çep gözi hem biygtyýar ýylgyrýar. Çep gözi aglaýan adamyň sag gözüne hem ýaş gelýär.
Menden soralsa, ýazyjy bilen tankytçynyň gatnaşyklary hem şeýle bolmagy gerek. Ikisi hem jan damary ýaly bir-birine baglanan bolmagy möhüm. Eger bu göz, beýleki gözi oýmagyň niýetinde gezse, munyň ahyry-soňy ikisem hem "sokur kör" bolup galar.