* * *

Menem aldym birini,
Sen çykdyň gitdiň özgä.
Ynanybam ýörmezdim
Ýogsa, ýazgyda, ýazga.

Bile ederdik seýran,
Şol baglar şindem barmy?
Şindem akdyr alkymyň,
Ýa indi zülpüň garmy?

Bizi nätdi goýaýdy
Ýyllar, ýyllar, ýyljyklar?
Men öýümi söýäýdim,
Ojak odum ýyljakdyr.

Guwanýan ogul-gyza,
Bary garagözelek.
Şu gün ýürek sen diýdi,
Boş göründi töwerek.

Garamy, ak ykbalym?
Ýagşy-ýaman hyýalym.
Men saňa goşgy ýazýan,
Çaý demleýär aýalym.

Ýürek özelenipler
Sorady öz hüýrüni.
Sen çykdyň gitdiň özgä,
Menem aldym birini.


SONET

Syrly ýylgyraňda syrylyp duman,
Seň nuruňdan göwnüm tümi ýagtyldy.
Ýüregimde şatlyk, kalbymda güman,
Salgymmy sen ýa dolanan bagtymmy?

Bagda bägül mymyk ýele baş atyp,
Biçäre bilbile ýaýkanda başyn,
Göwnüm kebelekleň yzyndan ýetip,
Soraýar perwana, dertdeş-syrdaşyn.

Ýaz gidipdi, ýetdik ýazyň yzyndan,
Sen menden, men bolsa senden bihabar.
Deňizde suw saplanar-da duzundan,
Bulut bolup galar, gül bolup ýagar.

Eger, gülüm, tapyşdyrsa aýralyk,
Gerekmikä gitmek bize aýrylyp?


Gurbanmuhammet AŞYROW