"DOGRY, ÝOLLAR KÄTE ÝADATDY MENI..."

Gurrasy ters düşýän tersa ykbalym
Bagtly pursatlara soranda idin,
Gysymymdan ak bagtymy sypdyrdym.
Ýa söýdümmi seni ýazgytdan bidin?!

Hakykat hyýal däl ýa-da arzuw däl,
Oňatlyga ýorulsa-da düýşlerim,
Beden, ruhum aýrylyp bir-birinden,
Terse çekdi hakdyr öýden işlerim.

Bagtyň deňlemesin çözüp bilmedim,
Gözýetim deý galdyň juda alysda.
Bir zady bil: Ynjalaryn, gül yslym,
Didäňdäki hijran ýaşy çalyksa.

Uzak ýollar aşyp ýanyňa geldim,
Seň üçin ýyllardan eýmenmedim hiç.
Otly gözleriňde ýanmak höwesi
Maňa kuwwat berdi şu güne deňiç.

Dogry, ýollar käte ýadatdy meni,
Ýüregimi kä birehim gam iýdi.
Şonda-da gözleňden gözledim özüm,
Berk gujaklap dyrnak ýaly umydy.


2014 ý.

Sapa HOMMADOW