Ýene howa garalyp, ýagyş çisňäp başlady,
Leýlisaçlar eda bilen saçlaryny çöşledi.

Beýle pikir etmändim men bu golaýda, bu çakda,
Birden agyr oýa batdym ölüm hakda, sen hakda.

Oýa batdym: Ýoklugymda öňküsi deý ýagar ýagyş,
Gunçalaň agzyny açar, aýnamyza çeker nagyş.

Dag tarapdan taýyp geler ýaşyl şemal, näzik şemal,
Niçik oýa batarsyň sen meniň ýoklugymda şo hal?!

Geldi şonda göz öňüme bir perişan halyň seniň,
Edil şunky howa ýaly, syýa ýaly şalyň seniň.

Hesretiň gara deňzinde gark bolup ýörüşiň seniň,
Mensiz galan bu dünýäni dowzah deý görüşiň seniň.

Diýdim şonda öz-özüme: “Eý, ýok zatlaň pikrin eden,
Heý, ýary şu halda taşlap, gidip bormy bu dünýeden?”


✏Gurbannazar EZIZOW

Gurbannazar Ezizowa

Barýas seniň gezen mekanlaryňa,
Seniň geçen köçeleňden geçýäs biz.
Girýäs seniň giren dükanlaryňa,
Seniň içen çakyrlaňdan içýäs biz.
 
Bizem alyp gidýär islän ýermize
Seni çar tarapa äkiden ýollar.
Agam girýär, aňam girýär sermize,
Durmuş sahnasynda çalşyp dur rollar.
 
Göwnün alýas ýakynlaryň, ýatlaryň,
Dost-ýar bilen günümizi ýaşyrýas.
... Göräýmäge seň başaran zatlaryň
Hemmesini bizem bu gün başarýas.
 
Wagty geler, bize-de nyrh keserler,
Gaýtargy deregne oklanjagmyz ýok...
Ýöne welin, seňki deýin eserler
Entejik bize-hä başardaýanok.
 
Käte özümizi aldyrjak bolup,
Senden galan sadalygy öldürýäs.
Öz barlygymyzy bildirjek bolup,
Bu gün seniň ýoklugyňy bildirýäs.

✏Ş.N.

MÄMMET SEÝIDOW:

Gazan doly süýde gaçan zäk bolup,
Birje gün bir ýylyň tagamyn ýoýdy.
Adamlaryň gaýa ýaly göwresin
Ezilen torgaýa dönderip goýdy...

KERIM GURBANNEPESOW:

Gitdiň. Agladyk.
Şu günem — üçüň.
Diýmek, gidenňe
Bolupdyr üç gün.

Üç gün, üçje gün —
Ölüm üçin hiç.
Aglarys öýtdük
Kyrkyňa deňiç.

Aglarys öýtdük
Ýylyňa çenli...
Aglamak juda
Kyn bora çemli.

Ýene çaý-nahar,
Ýene-de gülki.
Onsoň gybatam
Ediler, belki.

Aýdyşym ýaly —
Edildi gybat.
Soň şorta söze
Berildi nobat...

Bir sagat ozal
Belläpdik üçüň.
Parhlyrak bolgun,
Günämiz geçgin!

Geçseň-geçmeseň,
Bolşumyz şeýle.
...Gün bolsa eýýäm
Bolupdyr öýle.

Öz öýlesini
Duýanok hiç kim...
Gitdiň. Hoşlaşdyk.
Agladyk üç gün.

Aglarys öýtdük
Üç gün däl, on ýyl.
(Şoňa mynasyp
ýitirlen ogul!)

Aglarys öýtdük
Uzak, uzak, uzak.
Aglamak hakmy?
Aglamazlyk hak?

Ynsaba bagly
Bu garry sowal.
Häzir dymylsyn,
Jogap hökman däl...

HALYL KULYÝEW:

Bu dünýäde bolýar erkek doganlar,
Ýene bu dünýäde bolýar uýalar.
Bir garynda ýatyp, bile doganlar
Biri kemis bolsa, biri uýalar.

Ýok, biz ikimiz doganam däldik,
Ýöne ikimiziň birdi uýamyz.
Biz — bizdik:
Men Halyldym, senem Gurbannazardyň,
Bir almany ikä bölen ýalydyk.
Birdi namysymyz,
Birdi haýamyz.

Bir garynda ýatmasamam seň bilen,
Men giň dünýäde täk galdym sensiz.
“Gurbannazar öldi?!”
Bu habar ýalan!
Kimdir biri meni aldandyr kemsiz.

Adamlar, bir zada düşünmek gerek,
Näm üçin bir zady bileňizok siz?
Ýürek şeýle diýýär, şeý diýýär ýürek:
“Nädip ýaşamaly Gurbannazarsyz?!”

Entek başym dikkä ýene ýazaryn,
Sen maňa düşýänsiň, Gurbannazarym!

ITALMAZ NURYÝEW:

Siz gitdiňiz...
Siziň bilen geçirlen
Goşguly gijeleň, gündizleň baryn
Indi her gün hakydamda oýaryp,
Şol goşa dünýäni göterip ýörün...

ÖWEZMYRAT BABAÝEW:

Seni tanamaýan käbir şahyrlar
Aýagaldygyna “şygyr” ýazýarlar,
Bu döwürde uzalypdyr susaklar,
Seniň adyň bilen at gazanýarlar,
Olara ýagyp dur köp gonorarlar.
A sen zehinlere nazar salardyň,
Şonuň üçin Eziz Gurbannazardyň!..

ANNALY BERDIÝEW:

Daglar, baglar, ýollar ýatladar durar
Nurana keşbini, gadyr-gymmatyn.
Hergiz kalbymyza hemra bor ýörer
Ýeketäk zürýady Eziz Hümmediň...

AHMET GURBANNEPESOW:

...Bir oňat gyz sy-pan
Hem şemal sy-pan
Bu başym gargadyr,
Bilbile — hekem.
Maňa “Göwnüň çökgün” diýme, halypam,
Şem ýanan mahaly aglaýan eken...

NOBATGULY REJEBOW:

...Ýanýar, daragtlaryň ýapragy ýanýar!
Wah, gyrmyzy güýzüň derdi öňdenem...
Bu o:t alan güýzi gözýaşlar bilen
Öçürersiň neneň?
Öçürjek neneň?

NAZAR GULLAÝEW:

...Gyş geler, daglarmyz gara bürener,
Ýaz geler, baglarmyz bara bürener,
Tomus ge:r, ülkämiz nura bürener,
Ah, ýöne güýz geler Gurbannazarsyz!..

GURBANÝAZ DAŞGYNOW:

Durnalar gaýmak dek syrylyp güýzde,
Ýapraga ýaýranda güýzüň gussasy,
Gelýär durnalaryň owazy bilen
Gurbannazaryň sesi.

NÄZIK ANNATYÝEWA:

Gursagyňyz aýdymlardan doludy,
Neneňsi kesildi juwan ömrüňiz?
Aramyzdan ir gitdiňiz sogrulyp,
Tüýs gülleýän,
Miwe berýän döwrüňiz...

AMANMYRAT BUGAÝEW:

...Ynha, menem goşgy ýazýan sen hakda,
(Düýn-ä oglanmyşym, bu gün hem goja!)
Seniň diri wagtyň ýeriň ýüzünde
Bu dana sözlerim gidipdi küjä?!

ŞADURDY ÇARYGULYÝEW:

...Penjireleň tutusyn
Oýnap girýän şemalda
Seň sesiň bar, ol bize
Kuwwat berýär her halda.

ANNABERDI AGABAÝEW:

Sözlense bir ataň goç ogly hakda,
Bir enäň ýaz ogly hakda sözlense,
Başdaşyna — bägül,
Balasyna — bal,
Ýoldaşyna — gardaş,
Dostuna — ykbal
Ýigitleň içinden ýigit gözlense,
Saňa meniň gözlerimden gitme ýok,
Saňa meniň sözlerimden gitme ýok!

Jahyllar agzasa “jahyllyk” sözün,
Kämiller agzasa “kämillik” sözün,
Şygyrýet bagynda
Juwan çagynda
Bir gunça göterip nurana ýüzün,
Ýagtyltsa azajyk türkmeniň düzün,
Saňa meniň gözlerimden gitme ýok,
Saňa meniň sözlerimden gitme ýok!

Baharyň çogunda,
Çilläň garynda
Daň ýyldyznyň dogjak-dogjak çagynda,
Ýaşlygmyzyň şol gadymy bagynda
(Üstünden geçse-de tomuslar, gyşlar)
Seni aýdym edip saýraýar guşlar.
Şoňa meniň gulagymdan gitme ýok,
Saňa meniň ýüregimden gitme ýok!

Ÿatan ÿeri ÿagty bolsun. Gurbannazar Ezizow beÿik şahyr gysga ömründe türkmen poeziÿasynda öçmejek yz goÿdy.

Ezizowyň ölümi edebiýata uly utuş getirdi.

shu shahsyyetin olumi hen syrlyrak men uchin (yorite edilen yaly)... yatan yeri yagty bolsun...

Yatan yeri yagty bolsun. Kerim Gurbannepesow bn Gurbannazar Ezizowyn goshgularyna soz yok

83 ýylam-a geçipdir welin,
Aramyzda diri ýaly henizem.
Beýikler mydam ýaşamaly bolsa,
Baky ýaşar Gurbannazar Ezizem...


Y.G

Ýatan ýeri ýagty, jaýy jennetden bolsun.

Yatan yeri yagty bolsun...

Serpaý

"Men size bahasyz serpaý ederin —
Şalaryň elinden gelmejek serpaý."

(Gurbannazar Ezizow)

Ah Gurbannazarym!
Beýik şahyrym!
Sen şeýle serpaýy etdiň jedelsiz.
Menem şeýle serpaý edesim gelýär.
Ylymym az,
Söz gorymam ýetersiz.

Kalpda kürsäp duran duýgylarymam,
Poslan demir deýin galmasyn çüýrap.
Gursakda gaýnaýan gaýgylarymam,
Dillerden döküler galmasa gurap.

Iň esasy näme hakda ýazmaly?
Aýt näme ýazmaly?
Şony ýazaýyn.
Bu ömrüme gör nämeler sygarka?
Ýazyp bildigimden göni ýazaýyn.

Şeýle uly bagty tapasym gelýär .
Jaýdar jümlelerim bolsun jaýba-jaý.
Menem şeýle serpaý ýapasym gelýär,
Şalaryň elinden gelmejek serpaý.

Gerçeknazar Amannazarow