KAKA MENEM SEN DEÝ BOLASYM GELÝÄR

Gerdenimde çekmek üçin dertleri,
Kaka menem sen deý bolasym gelýär.
Halal zähmet çekip gara derimi,
Kaka menem sen deý dökesim gelýär.

Kyblam sende maşgalamyñ bagty bar,
Keramatly ojagmyzyñ mähri bar,
Sensiñ çagalykdan maña gahryman,
Kaka menem sen deý bolasym gelýär.

Eklenç diýip, ir gidip, giç gelseñem,
Illerden kem etmän baryñ berseñem,
Hat-da ýyrtylsa-da soñky köwşüñem,
Şonda-da sen deýin bolasym gelýär.

Sen deý bolmak çensiz söýgüñ beýgidir,
Sen deý bolmak daragt köküñ düýbüdir,
Pata alyp keramatly duýgudan,
Kaka menem sen deý bolasym gelýär.

Kakama çekipdir göwün pesligim,
Beýik Tañrydan soñ mukaddesligim,
Iki dünýä etjek ýeke dilegim,
KAKA MENEM SEN DEÝ BOLASYM GELÝÄR.

Jemşit Hajymämmedow