Jadygöý

Gyrasy gyýçakly gara ýollaryň,
Aý şöhlesi düşýän daşyna degen,
Aýagyna agram berýän gollaryň,
Saçyny penjeläp, başyny egen
Däliräp, gygyryp, için boşadyp,
Sessiz tümlük bilen aglaşan wagty
Sen dälmidiň bir degmezi hoş edip,
Gara ýaglyk bilen ýitiren bagty?

Sen jadygöý, sen bir pahyr ýalançy
Edil ýyldyzlar deý başymy örtdüň,
Senden dynmak üçin gijeler ýatyp,
Diňe gündiz bilen ýaşadym ýördüm.

Söýgä jadygöý deý oýun gurmadym,
Gaýtam, oňa nebsim agyrdy barha,
Gara ýaglygyny bulap durmadan
Ol nähili lezzet alyp bolýarka?

Diňe ejizligiň kadasy bilen
Ýaşasa, durmuşdan utulýar şahyr,
Gözbagçy ykbalyň ýazgydy has teň,
Hatda jadylaram gutarýar ahyr.

Bägül ATAÝEWA