Sen tä şu pursada çenli tanan, jora bolan gyzlarymyñ hatda içki dünýäsine az salymlygam bolsa aralaşmagy başaran ynsanlarymyñ ählisinden başgaça. Munuñ şeýledigini olaryñ hiç biri inkär etmese gerek.
Ýaz ýaly ýakymly duýgularyñ, sada göwnüñ we töweregiñdäki adamlaryñ özüñ hakyndaky pikrine asla pisint etmezligiñ bilen parhlanýarsyñ. Häzir muny okap "Seniñ beýleki joralaryñ sada dälmi nä?"diýmegiñ ahmal. Ýok, joralarymyñ ählisi sada, kiçigöwünli, akýürekli gyzlar. Eger şeýle bolmasady juda az sanly ynsanlara edil del muzeýdäki sergi kimin apalap görkezýän ýüregimi açmazdym olara.
Ýöne sende mahal-mahal bolmak isleýän kişimi görýärin: Özgeleriñ özi hakyndaky pikri, il-günüñ näme diýjekdigi bilen asla gyzyklanmaýan ynsan. Wakalary bolşy ýaly däl-de bolmagyny isleýşi ýaly kabul edýän kişi.
Mundan bir-iki aý öñ işde şowsuz günler geçiripdim. Adalatsyzlyga uçrapdym. Günlerimi aglamak bilen geçirýärdim. Şeýle günlerde iñ esasy tesellim saña jañ etmek bolýardy. Seniñ bile habarlaşan mahallarym ýaşaýan dünýämden juda alys, şol bir wagtyñ özünde-de juda ýakyn dünýä - Gültäjiñ gyzykly dünýäsine syýahat edýärdim. Ol dünýäniñ içinde aýlanyp başagaý bolup ýörşüme öz dertlerim ýatdan çykýardy.

*******
Bu oýlanmamy takmynan geçen ýylyñ şu günlerinde ýazyp başlapdym. Mynasyp jemlemäni agtaryp ýörşüme wagty bilen nokadyny goýmandym. Asyl, takdyr başgaça jemlemäni peýläp goýan eken...

**********
Bu gün günortanlyk naharyna garbanyp otyrkam dostumyñ telefonyma ýazan sms-ini okadym. Saýtymyzyñ @Mähek atly agzasy Gültäjiñ ömür tanapynyñ üzülendigi barada habar berýärdi. Derrew anygyna ýetmek üçin dostuma jañ etdim. Olam bir tanyş gyzdan bu barada eşdipdir. Aýtmagyna görä, gyz Gültäje jañ edeninde telefony onuñ jigisi alyp, ajy habary aýdypdyr. Gyz ynanmazçylyk edensoñ ejesiniñ belgisini beripdir. Şeýlelik bilen habaryñ ýalan bolmagyny umyt edip, Gültäjiñ ejesine jañ etdim. Telefony galdyran mähirli zenan sesine haçandan bäri Gültäç bilen habarlaşyp bilmeýändigimi aýdanymda ajy sözleri enäniñ dilinden eşitdim. Enäniñ "Ömri gysga eken gyzymyñ" diýen zaryn sözleri bokurdagymy hykga doldurdy.
*****
Haçandan bäri serimde Gurbannazaryñ "Topragyñ üstünden ömürler geçýär" diýen setiri aýlanyp ýör. Ala-böle şu setiriñ serimde pelesañ kakyşyna teý düşünmeýärdim. Munuñ hikmetine şu gün düşündim. Topragyñ üstünden şeýle bir ömürler geçdi, şolaryñ arasynda Balkan ilinde ýaşamak nesibi çeken mylaýym, owadan, ak ýürekli Gültäç gyzyñam ömri bir ýyldyz mysaly gaýyp geçip gitdi. "Atasyz ýetim, enesiz ýesir" diýlişi ýaly yzynda suw ýaly perzendi galdy. Ýatan ýeriñ ýagty bolsun, joram! Jaýyñ jennet bolsun, Gültäç!