Säher ýyldyzy

Içi çalaja saýgardýan garañky otag görünýär.Kamera ýuwaşjadan gapynyñ agzyndan başlap otagyñ içindäki detallary görkezýär. Şkaf, kitap tekjesi, şifonýer, çeker... Soñam iş stolynyñ üstünde el çyranyñ ýagtysy görünýär. 30-35 ýaşyndaky erkek kişi şol çyranyñ ýagtysyna kagyzyñ ýüzüne bir zatlar ýazýar. Daşyndan ses berilýär. Bu ses onuñ kagyzda ýazan sözlerini aýdýar:
"Söýmek üçin nämeler derkar?Yssy mähir,duýgudan pürepür kalp... A sagdyn aýaklar?!Olaram zerurmyka?Ine, size gürrüñ berjek durmuş hekaýatym şu hakda".
Ýazyp oturan ýigit elindäki galamyny emaý bilen kagyzyñ ýüzünde goýýar. Gözüni bir nokada dikýär. Hyýalynda geçmişdäki wakalar janlanýar.
*******
Oba durmuşy görünýär. Hatar-hatar jaýlar. Köçede üýşüp oýun oýnap ýören çagalar görünýär. Çagalardan biri-de hälki ýazyp oturan ýigdiñ çagalygy. 11-12 ýaşlarynda. Ol oglanlar bilen aşyk oýnaýar. Aşyk zyñmak gezegi ýetäýen pursadynda-da añyrdan maýyp tigirçeginiñ tekerlerini oturan ýerinden eli bilen sürüp gelýän Bagtyýary görýär. Aşygyny taşlap oglanlara ýüzlenýär:
- Siz oýnaberiñ oglanlar. Gelerin soñ.
Ylgap Bagtyýaryñ ýanyna barýar. Ýüzüne seredip ýylgyrýar. Bagtyýaram oña seredip ýylgyrýar. Ikisi bile ýöräp Bagtyýarlaryñ howlusyna girip gidýärler.
*******
Bagtyýaryñ goñşusy Sähralaryñ howlusy. Gyzyñ adaja aýdyma hiñlenýän sesi eşdilýär. Özi görnenok. Bag-bakjaly howly. Alma, erik baglary. Soñ howludaky güller görünýär, gyzyl bägüller we ş.m. Soñam elinde gül suwarylýan bilen güllere suw berip aýdyma hiñlenip duran owadan gyz - Sähra görünýär. Sähra gülleri suwaryp bolýar-da, alma bagyndan eliniñ ýeten ýerindäki almalary ýoluşdyryp, gaba atyp goñşylaryna tarap ugraýar. Goñşylarynyñ howlusy görünýär. Gyz howludan girip gapynyñ agzynda durýar-da gapyny kakýar. Gapy açylýar. Işikde Bagtyýaryñ ejesi dur:
- Sähra jan gowmy gyzym, aman saglykmy? Gel giräý.
- Howwa, gowylyk. Gowmy sizem? Girip durmaýyn Maral gelneje, bagymyzyñ almalary bişipdir. Şondan dadyraýyn diýip getirdim.
Sähra elindäki almalary Maral gelnejä uzadýar. Maral gelneje alýar-da ýylgyryp, Sähra ýüzlenýär.
- Bizem bir tap bardyrys gyzym. Her ýyl şeýdýäñ-dä sen. Azar edinmeli däl ekeniñ. Gel, çaý içeli.
- Azary bormy, Maral gelneje. Häzir ýöräýin. Öýde işlerim bar.
Sähra şeý diýip gapydan uzaklaşýar. Kamera işikdäki Maral gelnejäni görkezýär. Ol almalary alyp otaglaryñ birine girýär. Otagda Bagtyýar bilen hälki oglanjyk - Durdymyrat otyr. Maral gelneje almalary olaryñ öñünde goýýar.
- Alyñ Sähra jan getirdi.
Maral gelneje çykyp gidýär. Myrat işdämenlik bilen alma topulýar. Bagtyýara-da alyp berip, uzadýar. Ikisi-de almadan iýip başlaýar. Durdymyrat alma iýip oturşyna dillenýär:
- Bah süýjidigin-äý.
Bagtyýar sesini çykarman ýüzünde ýylgyryş bilen almany iýýär. Onuñ bolşuny geñlän Durdymyrat sözüniñ üstüni ýetirýär.
- Sähra size näme üçin alma getirýär-äý? Getirmese-de bolar-a.
Bagtyýar bu gezek gepleýär.
- Ol her ýyl alma bişen badyna bize getirýär.
Durdymyrat Bagtyýaryñ ýûzüne many okajak bolup seredýär.
- Sähra gowy gyz gerek.
Bagtyýar hiç zat geplemän dymýar. Gözi penjirä düşýär. Penjireden garabaşynagaý bolup daşary süpürip ýören Sähra görünýär. Bagtyýar ýylgyrýar. Soñam birdenkä bir zat ýadyna düşen ýaly aýagyna seredýär. Ýüzüne gussa çaýylýar. Az salymlyk gussaly saz ýañlanýar. Birdenem oýa çümen Bagtyýar içki pikrini daşyna çykarýar.
- Men bir gün aýaga galyp ýörärin. Şonda şol bagdaky almalary özüm ýolup, iñ süýjilerini Sähra eltip bererin.
Durdymyrat Bagtyýara soragly garaýar.
- Sen Sährany gowy görýäñmi?
Bagtyýar hiç zat geplemän ýene penjirä garaýar.
******
Agşamara. Sähralaryñ öýi. Otagda arkasyny diwara söýäp Sähra keşde çekip otyr. Ejesi Bossantäç gapydan girýär we Sähranyñ öñüne geçip oturýar.
- Ho-ol araky gelenler ýene geldi.
Sähra biperwaýlyk bilen keşde çekmegini dowam edýär.
- Gelse gelipdirler.
Bossantäç gelneje janygýar.
- Beý diýme-de belli-külli jogap aýt. Kakañam menem ýadadyk. Ýagdaýlary gurpluja. Sorap-idesek adam çykýan ýer diýdiler.
Sährä gaşyny çytyp, işine dowam edýär.
*******
Bagtyýarlaryñ öýi. Bagtyýar gapdalyndaky partada birtopar gazetleri üýşürip, birinem gujagyna alyp okap otyr.
Gapydan Durdymyrat girýär.Gele-gelmäne Bagtyýara ýûzlenýär.
- Sähra guda gelipmişin. Olam "Şolara durmuşa çykjak däl" diýenmiş.
Bagtyýaryñ ilki ýüzüne gussa aralaşyp, soñ açylyşýar. Gujagyndaky gazeti okamagyny dowam edýär. Durdymyrat onuñ gazetdäki seredip oturan ýerine tiñkesini dikýär.
- Sen goşgy okaýañmy?
- Howwa.
Durdymyrat ýene gazete seredýär-de kellesine bir pikir gelýär.
- Sen Sähra bagyşlap goşgy ýazsana.
Bagtyýar ör-gökden gelýär.
- O näme üçin?
- Sähra goşguly kitaplary oñat görýän eken. Arada ol maña "Maña-da şeýdip biri goşgy ýazaýmal-a" diýdi.
Bagtyýar müýnli gözlerini Durdymyrada aýlaýar.
- Men goşgy ýazyp bilemog-a.
- Öwrenersiñ. Isleseñ saña mekdep kitaphanasyndan goşguly kitaplaram getirip bererin.
Hereketli saz başlaýar.
******
Sazyñ astynda Durdymyradyñ kitaphanadan belli şahyrlaryñ kitaplaryny ýazdyryp alyşy görkezilýär. Mekdepden gelişine ol kitaplary Bagtyýara eltip berşi, Bagtyýaryñ kitaplary alyp galyşy görkezilýär. Durdymyrat gaýdanyndan soñ Bagtyýaryñ kitaplary okap otyrşy belli-belli ýerlerini gapdalyndaky partada duran depdere bellik edişi görkezilýär. Soñ sagat görkezilýär. Ilki sagat 12. Bagtyýar kitap okap otyr. Sagadyñ dilleri aýlanýar. Sagat 17:00. Bagtyýar depdere bellik edip otyr. Sagadyñ dili ýene aýlanýar. Sagat gije ýarym. Bagtyýaryñ gujagynda kitap bilen uklap galyşy görkezilýär. Maral eje Bagtyýaryñ otagyna girip ýuwaşlyk bilen elindäki kitabyny partañ üstünde goýýar-da oglynyñ üstüni örtýär. Hereketli saz gutarýar.
******
Mekdep.Durdymyrat mekdebiñ howlysyndan çykyp gelýär. Seretse, howlynyñ daşynda Bagtyýar garaşyp dur. Durdymyrat geñirgenýär. Geplejek bolýar ýöne Bagtyýar ondan öñürdýär. Sakawlap-sesi sandyrap gepleýär.
- I- ine , men goşgy ýazdym Sähra.
Durdymyrat Bagtyýaryñ elindäki goşguly kagyzy alýar-da, "Sen häzir garaş" diýip mekdebe yzyna girýär we zalda edebiýat mugallymyny tapyp, oña goşgyny uzadýar.
Şirin mollum goşgyny okaýar.
- Ýaman däl. Boljak. Özüñ ýazdyñmy?
Durdymyrat " ýok" diýen manyda başyny ýaýkaýar we ylgap çykyp gidýär. Edebiýat mugallymy yzyndan seredip galýar.
Howlynyñ agzynda garaşyp duran Bagtyýaryñ ýanyna barýar. Bagtyýar:
-Näme boldy? Näme üçin yzyña dolandyñ - diýip soraýar. Durdymyrat
- Kitabymy galdyrypdyryn. Şony alyp gaýtdym - diýip, sapajak-supajak edýär.
Bagtyýar haýyşyny aýdýar.
- Şu goşgyny Sähra eltip bersene.
Romantiki saz ýañlanýar.
******
Dükan. Sähra elinde torbalar bilen dükandan çykýar welin Durdymyrat bilen gabatlaşýar. Durdymyrat Sährany saklaýar-da kisesinden çykaran goşgyly kagyzyny uzadýar. Sähra torbalaryny ýerde goýup, goşgyny okamaga durýar. Goşgyny okadygyça ýüzünde owadan ýylgyryş emele gelýär. Okap bolup Durdymyrada seredýär:
- Muny kim ýazdy?
- Bagtyýar.
- Goñşymyz Bagtyýarmy?
Durdymyrat "howwa" diýen manyda başyny atýar.
Sähranyñ ýüzüne gaharly görnüş çaýylýar. Elindäki haty bölek-büçek edip ýere oklaýar. Durdymyrada haýbat atýar
- Gaýdyp maña şondan hat getiräýme, eşitdiñmi, bezzat.
Ýerdäki torbalaryny alyp gaty-gaty ýöräp, hüñürdäp gidýär.
- Men-ä oña dözmezçilik edip ýörün. Ol bolsa gör, nähili pikirde eken.
Onuñ sözleri gulagyna ilen Durdymyrat başyny öñe egýär. Soñam ýerde ýatan kagyz bölejiklerini çöpleýär.
*****
Durdymyradyñ öýi. Irden. Gussaly saz ýañlanýar. Gussaly sazyñ astynda Durdymyrat ýerinden turýar, ýüzüni ýuwýar. Serinde Sähranyñ sözleri aýlanýar. Gussaly saz dowam edýär. Synp otagy. Durdymyrat sapakda. Mugallym sapak düşündirýär. Durdymyradyñ ünsi sapakda däl. Ýene Sähranyñ sözleri serinde aýlanýar.
Gussaly saz dowam edýär.Köçe. Durdymyrat mekdepden gelýär. Serinde ýene Sähranyñ sözleri.
Durdymyradyñ öýi. Durdymyrat içini gepledýär.
"Näme etmeli? Sähranyñ ýürek awadyjy sözlerini Bagtyýara aýtmalymy?"
Durdymyradyñ göz öñünde Bagtyýaryñ gussaly keşbi janlanýar. Içgepletmesine dowam edýär:
"Ýok. Gowsy aýtmazlyk".
******
******
Aý aýdyñ gije. Äpet agajyñ aşagynda dik duran bir ýigdiñ sudury garañkyrap görünýär. Añyrdan assa basyp ädimläp gelýän gyzyñam ýüzi garañkyrap görünýär. Kimdigi saýgarylanok. Gyz ýigdiñ ýanyna ýetýär. Kamera ýigdiñ ýüzüne gönügýär. Ýigit gyza aşyk nazarlaryny aýlap hyjuw bilen ýüzlenýär:
- Sähram.
Dartgynly saz goýberilýär. Sazyñ astynda Sähranyñ uýaljyrap duran ýüzi aý aýdyñ saýgarylýar.
Ýigit gyza şol bir nazarlary bilen söýgi sözlerini aýdyp ugraýar.
- Egmesene başyñy. Seni nähili söýýänim bilmän duran zadyñmy nä? Seni şu duşuşyga razy etmek üçin neneñsi kösendim. Ine-de sen gaşymda. Düýşlerimiñ hakykata öwrülmegi sen.
Ýigit Sähranyñ ýüzüne intizar nazarlaryny aýlap jogaba garaşýar. Sähranyñ şol başyny egip durşy. Ýigit özelenmelerine dowam edýär.
- Dymmasana Sähram. Ýagşydan-ýamandan bir zatlar diý ahyry. Ýalkasañ ýazym, gargasam gyşym sen.
Birdenkä-de ýigit dymyp oýlanýar. Soñam ýylgyrjaklaýar.
- Ýa şu sessiz razylyk berdigiñmi, gülüm?! Aýtsana, razymy sen maña?
Sähra başyny galdyryp, myssa ýylgyrýar.
******
Bir hepde soñ. Bagtyýar Durdymyratlaryñ öýüne barýar. Durdymyradyñ ejesi Bagtyýary garşy alýar. Bagtyýar aýtmasyzdan Durdymyrat üçin gelenligini añýar.
- Gel, oglum. Durdymyrat içerdedir.
Bagtyýar Durdymyradyñ oturan otagyndan içeri girýär. Durdymyradam pikre çümüp otyr. Bagtyýary görüp, ukydan açylan ýaly bolýar. Bagtyýar öñürtileýär:
- Sähra haty ber diýenimden soñ görünmediñ-le. Berdiñmi haty?
Dartgynly saz ýañlanýar. Durdymyrat Bagtyýaryñ ýüzüne sessizje tiñkesini dikýär.
- Saña diýýän.
- Hä, howwa berdim.
Bagtyýaryñ sesi sandyraýar. Tolgunýany bildirýär.
- Näme diýdi onsoñ?
- Sag bolsun aýtdy. Ýazmagyny dowam etsin diýdi.
Dartgynly saz goýberilýär.
Bagtyýaryñ ýüzi ýagtylyp gidýär.
- Dogrudanam şeý diýdimi?
- Dagy näme?!
Bagtyýaryñ sesi bu gezek şadyýan çykýar.
- Sag bol dost, sen maña ullakan ýagşylyk etdiñ.
Durdymyratdan jogap gelmänsoñ sözüniñ üstüni ýetirýär.
- Ýene şeýdip goşgy ýazsam eltip berersiñ gerek?!
Durdymyrat sessiz başyny atýar. Dartgynly saz dowam edýär.
******
Hereketjeñ saz başlanýar. Bagtyýarlaryñ öýi. Bagtyýar goşgy ýazýar. Durdymyrat gapdalynda gussaly nazary bilen ony synlaýar. Bagtyýar ýüzüne seredeninde bolsa bildirmejek bolup ýasama ýylgyrýar. Bagtyýar goşgyny gutaryp, Durdymyrada uzadýar. Durdymyrat Bagtyýarlaryñ öýünden çykýar.
Hereketjeñ saz dowam edýär. Mekdep. Durdymyrat synp otagynda Şirin mugallyma Bagtyýaryñ goşgysyny görkezýär. Şirin mugallymyñ oñat sözler aýdýandygyny ýüzündäki ýylgyryşdan bildirýär.
1 hepde soñ. Ýene Bagtyýarlaryñ öýi. Ýene şol bir ýagdaý gaýtalanýar. Ýene mekdep. Ýene şol ýagdaý.
Ýene bir hepde soñ. Ýene şol ýagdaý. Bu gezek edebiýat mugallymynyñ sözleri eşdilýär.
- Berekella! Dostuñ ilki ýazyp başlan gününden bäri juda kämilleşdi. Bu goşgy onuñ şahyr çykandygyny görkezýär.
Durdymyrat ýylgyrýar. Ýöne onuñ bu ýylgyrşy gussaly ýylgyryş. Hereketjeñ saz ýene dowam edýär.
Durdymyrat elinde Bagtyýaryñ goşgyly kagyzy bilen mekdepden gaýdyp gelýär. Otagyna girýär. Otagyndaky çekeri açýar. Çekeriñ içi şeýle kagyzlardan doly. Durdymyrat hyrçyny dişläp bu kagyzam şolaryñ arasyna salýar. Gussaly saz ýañlanýar.
******
Sähralaryñ öýi. Dartgynly saz goýberilýär.Daşarda gymmatbaha ulag. Ulagdan eli saçakly iki sany zenan düşýär. Olary Sähranyñ ejesi Maral gelneje garşy alýar. Zenanlar törde ornaşanyndan soñ saz gutarýar. Myhman zenanlaryñ biri söze başlaýar.
- Tüweleme Sähra janyñ görk-görmegi dillerden düşenok. Şonuñ ýaly gyzy törümize gelin geçiribilsek armanymyz ýokdur.
Maral gelneje ätiýaçly gepleýär.
- Bir gyzy müñ kişi islär, bir kişi alar. Kakasyna-da maslahat salmak gerek.
Myhman zenanlaryñ beýlekisi söze girýär.
- A gyz, jora, ýaşlar biri-birini halansoñ, bize diñe "Bagtly boluñ!" diýäýmek galýar.
Maral gelneje sessiz başyny atýar.
******
Bagtyýarlaryñ öýi. Durdymyrat bilen Bagtyýar özara gürrüñleşip otyrkalar Bagtyýaryñ ejesi işikde görünýär. Ol şo-ol işikde durşyna oglanlaryñ ýüzüne ýyrş-ýyrş edip, täzelik buşlaýar:
- Sähra guda bolupmyşlar. Öñümizdäki aý toýumyş.
Dartgynly sazyñ astynda Bagtyýar bilen Durdymyrat biri-birine geñ galyjy bakyşlaryny oklaýarlar.
Bossantäç gelneje çykyp gideninden soñ Bagtyýar Durdymyrada ýüzlenýär.
- Ýöne Sähra meniñ goşgularymy halapdy ahyry.
Durdymyrat dymýar. Bagtyýar dowam edýär:
- Gowy görende näme?! Haýsy gyz maýyba barjak?
Gussaly saz ýañlanýar. Durdymyrat sessizje Bagtyýara seredýär. Gussaly sazyñ astynda Durdymyrat Bagtyýara seredip içini gepledýär:
- Bagyşla, dost! Men saña hakykaty aýdybilmedim...
Gussaly saz dowam edýär.
*****
1 aý soñ. Sähralaryñ gapysy. Toý gidip dur. Töwerek adamdan doly. Gelnalyjynyñ gelerine garaşyp daşardaky gelinler çagalar üýşüp durlar.
Soñ kamera öýüñ içini görkezýär. Sähranyñ oturan otagy. Sähra birkemsiz bezenip sülmüräp otyr. Otagyñ içi gyzlardan doly. Soñ oñ başyna aglamagy üçin ýaglyk atýarlar. Töwerekdäkiler ýeke-ýekeden çykýan gyz bilen hoşlaşýarlar.
Onýança-da köçeden ylgap toý edilýän gapa giren çagajyk görünýär.
- Gelnalyjy gelýär.
Her kim biri-birine gelnalyjy gelýändigini buşlaýar. Gelnalyjy gelip, guda tarabyñ getiren sazçylar saz çalyp başlaýar. Myhmanlar tans edýär. Toý däpleriniñ ählisi ýerine ýetirilýär. ( kürte atyp, aýyrmak we ş.m) Sährany gapydan çykarýarlar.
Edil şol wagt kamera öz gapylaryndan toýy synlap duran Bagtyýary görkezýär. Ýanynda Durdymyrat. Gussaly saz goýberilýär. Bagtyýaryñ gözlerine ýaş aýlanýar. Birdenkä-de Bagtyýar özüne zor salyp, ýerinden turjak bolýar, başarmaýar. Durdymyrat ony saklaýar. Bagtyýar maýyp tigirçeginiñ tekerlerine elleri bilen urmaga başlaýar. Gaharly, gygyryp gepleýär.
- Sen sebäpli! Sen sebäpli Sähra meni söýmedi!
Bagtyýaryñ gözlerinden ýaşlary akmagyny dowam edýär. Durdymyradam aglaýar.
Sähranyñ saz bilen gelnalyjy ulaga mündürilişi görkezilýär. Gelnalyjy ýola düşýär. Bagtyýar ony görmek üçin maýyp tigirceginiñ tekerlerini eli bilen sürüp, köçä çykýar. Durdymyradam onuñ bilen bilelikde. Ikisi gelnalyjynyñ yzyndan garap galýarlar.
*****
1 ýyl soñ. Durdymyratlaryñ gapysy. Durdymyratlar göçýär. Ejesi, kakasy, Durdymyrat goşlaryny ulaga ýükläp ýör. Bagtyýar köçede. Olary synlaýar. Bagtyýary gören Durdymyrat goş ýüklemegini goýup , onuñ ýanyna barýar.
Bagtyýar gussaly nazaryny Durdymyrada aýlaýar.
- Indi senem meni taşlap gidiberjekmi?!
Durdymyrat aglap, Bagtyýary gujaklaýar.
- Bagtyýar , ýazmagyñy dowam et. Galamyñy taşlama! Ol saña syrdaş bolar.
Durdymyradyñ ejesi hemem kakasy goşlaryny ýükläp bolýar. Durdymyrady çagyrýarlar:
- Durdymyrat, gel, oglum!
Durdymyrat bilen Bagtyýar ýene gujaklaşýarlar. Gussaly saz ýañlanýar. Sazyñ astynda Durdymyrat maşyna münýär. Durdymyratlaryñ maşyny ugraýar.
*****
Gözüni bir nokada dikip geçmişini ýatlan Durdymyrat ýerinden turýar. Otagdan çykýar. Durdymyradyñ öýi görkezilýär. Öýüñ zaly görkezilýär. Gelni aşhanada nahar bişirýär. Gyzlary ýerde gurjak oýnap otyr. Ejesi diwanda telewizora tomaşa edýär. Durdymyrat olaryñ hersini buýsanç bilen synlaýar. Soñam ejesiniñ ýanyna geçip telewizora tomaşa etmäge durýar.
Telewizorda bagşy aýdym aýdýar. Sesi otagda ýañlanýar. Durdymyrat gussaly aýdymy lezzet alyp diñleýär. Aýdymyñ iñ soñynda "Sözleri - Bagtyýar Meredow" diýen ýazga gözi düşýär. Geñirgenýär. Içini gepledýär:
- Bagtyýar!
Öz ýanyndan aýdymyñ sözlerini gaýtalaýar:
- Sen entek sönmersiñ, säher ýyldyzym
Bilýän bir ýerlerde ýagty saçýanyñ.
Içgepletmesi dowam edýär:
- Diýmek, galamyñy goýmansyñ dostum! Seniñ hesretli söýgiñ saña şeýle setirleri ýazdyrypdyr.
Gözleri dolýar. Sähranyñ keşbi göz öñüne gelýär. Hyýalynda Sähra ýüzlenýär:
- Sähra, sen söýgä geleninde düşünmändiñ. Indi weli ol söýgi däl sungat!
Gussaly saz ýañlanýar. Sazyñ astynda Bagtyýaryñ keşbi görünýär hemem ýañky aýdym bolan goşgy setirleri öz okamagynda ýañlanýar:
- Sen şeýle bir bagtly bolgun , Mähriban
Hiç bolmanda söýgim harlanña degsin!

Hereketjeñ saz başlanýar.
Durdymyrat öýüñ içini akan-dökän edip Bagtyýarlaryñ telefon belgisini gözleýär. Ahyrynam tapýar. Şol belgä jañ edýär.
Kamera Bagtyýarlaryñ öýüni, öýüñ içinde gygyrýan telefony görkezýär. Telefony Bagtyýaryñ ejesi göterýär. Durdymyrat ikisi hereketjeñ saz astynda hal-ýagdaý soraşýarlar.
******
Ertesi gün. Durdymyrat gelni we 3-4 ýaşlaryndaky gyzlary bilen öñki ýaşan obasyna gelýär. Gussaly saz astynda ulagly gelýän wagty çagalyk döwürlerini Bagtyýar bilen bile tirkeşen günleri göz öñüne gelýär. Gözleri dolýar. Ahyrynam Bagtyýarlaryñ howlusynyñ deñinde ulagy togtadýarlar. Durdymyrat töwerege teşne nazarlaryny aýlaýar.
Bagtyýarlaryñ öýüniñ gapysyny kakýarlar. Gapyny Bossantäç gelneje açýar.
- Durdymyrat oglum! Tüweleme, uly adam çykypsyñ.
Bossantäç gelneje Durdymyrada mähirli nazaryny aýlaýar. Soñ onuñ gelni bilen aman-saglyk soraşýar. Gyzlarynyñ adyny soraýar.
Şeýdip gapynyñ agzynda hal-ýagdaý soraşmadan soñ Bossantäç gelneje olary içeri çagyrýar.
- Waý, men sizi gapyñ agzynda saklap duryn-a. Geliñ içeri. Bagtyýarjan öýde.
Durdymyrat dagy içeri girýärler. Bagtyýarlaryñ öýi öñkisine görä üýtgäpdir. Törde Bagtyýar ýene maýyp tigirçeginde goşgy ýazyp otyr. Durdymyradyñ ony görüp gözleri dolýar. Ylgap baryp gujaklaýar. Gözleri dolup durşyna gepleýär:
- Dost, sen hiç hili özgermänsiñ.
Bagtyýaram Durdymyrada ýylgyryp seredýär.
- Sen bolsa juda özgeripsiñ.
Ikisi gülüşýärler. Bagtyýar hem Durdymyradyñ gyzlarynyñ adyny soraýar. Onýança-da Bossantäç gelneje hem gelip ýanlaryna oturýar.
- Hödür-kerem etmedi diýip aýyplaşmaweriñ. Gelnim, häzir saçak ýazar. Durdymyrat allaniçiksi bolup Bagtyýara seredýär:
- Öýlendiñmi sen? Kime?
Bagtyýar syrly ýylgyrýar.
- Häzir özi gelende görersiñ.
Durdymyrat hem ýylgyrýar. Onýança-da otaglaryñ birinden başy gyñaçly Sähra çykýar. Aýgytly saz goýberilýär. Durdymyrat geñirgenenligini gizläp bilmeýär. Sähra Durdymyrada ýylgyryp seredýär.
- Durdymyrat. Gör, sen nähili ulalypsyñ?
Ikisi hal-ahwal soraşýar. Durdymyrat ýene soragly nazarlaryny Bagtyýara aýlaýar.
- Bu nädip beýle boldy?
Bagtyýar bilen Sähra biri-birine ýylgyryp seredýärler. Gussaly sazyñ astynda Sähranyñ geçmişi göz öñünde janlanýar.
Öñki ýanýoldaşy bilen eden dawalary, elinde goşlary bilen atasy öýüne dolanyşy, Bagtyýaryñ onuñ dolananyny synlap duruşy. Iñ soñunda saz togtaýar. Romantiki saz ýañlanýar. Köçe görünýär. Onda ýolda gabat gelen Sähra bilen Bagtyýar görkezilýär. Sähra gözleri dolup, Bagtyýardan ötünç soraýar.
- Men seniñ söýgiñe biparh çemeleşdim Bagtyýar. Bagyşla meni!
Bagtyýar bilen Sähranyñ birek-birege söýgi bilen garaýyşlary görkezilýär.
Kamera ýene häzirki wagta dolanýar. Sähra olaryñ ýanyna geçip oturýar. Durdymyrat aýgytly görnüşe geçip söze başlaýar.
- Men size bir zat aýtmaly. Belki, munuñ üçin meni bagyşlamarsyñyz...
Bagtyýar bilen Sähra ikisi biri-birine seredip gülüşýärler. Durdymyrat geñirgenýär. Wakalar ýene geçmişe dolanýar. Göçüp gitmezden öñürti Durdymyradyñ ejesi Gülnar gelneje goşlary aýyl-saýyl edip ýörkä çekerdäki ähli hatlaryñ üstünden barýar we olary Bagtyýara eltip berýär.
Wakalar ýene häzirki durmuşa dolanýar. Bu gezek Sähra gepleýär.
- Bagtyýar o hatlary soñ maña görkezdi. Şeýle bir ajaýyp, şeýle bir ýürekden ýazylan hatlardy.
Durdymyrat Bagtyýara ýüzlenýär:
- Sen menden gaty görmediñmi?
Bagtyýar jogap berýär:
- Ýok-la näme üçin gaty göreýin. Eger sen Sähranyñ ol haty ýyrtyp taşlaýşyny gürrüñ beren bolsañ men özümi kämilleşdirip bilmezdim.
Onýança-da açyk duran telewizorda Bagtyýaryñ sözlerine Durdymyradyñ diñlän aýdymy ýañlanýar. Oturanlaryñ ähli telewizora seredip aýdymy diñleýärler.

Soñy.