Satyn almadym men beýle ykbaly,
Ne günlere saldy bu ömür ýoly,
Bu dünýede gaýgy gussam ýok ýaly,
Ýagşy sözler sözläp ýörün ýylgyryp.

Bedenim ruhumam galdylar göýdük,
Sebäp gadyr bilmez ynsany söýdük,
Ýürekdä bir güni geläýer öýdüp,
Öz taýymy gözläp ýörün ýylgyryp.

Içe atyp hasratlaryň baryny,
Çekdim ýeke aýralygyň zaryny,
Geçmişim bu günden alýar aryny,
Göwün syrym gizläp ýörün ýylgyryp.

Kime gyzyk göz ýaşlarmyň gurany,
Tanatýar bu durmuş agy garany,
Senden ýadygärlik galan ýaramy,
Seni küýsäp duzlap ýörün ýylgyryp.

Ömür geçip barýa gynanýan haýyp,
Indi ejizlemek bolupdyr aýyp,
Halym sorasalar oňatla diýip,
Ýalan ýaşryk sözläp ýörün ýylgyryp.

Paýym aldym haýyrdanam şerdenem,
Şonuň üçin çökdi galdy gerdenim
Şygyrlamda dermany ýok derdimiň,
Ýumagyny çözläp ýörün ýylgyryp.

Gerek däl söýgüde gerek däl bagtam,
Ýanyma gelmäge ýokdur oň wagtam,
Setirlerden gurup öz köşgi tagtym,
Başarşymça bezäp ýörün ýylgyryp.

Süleýman Tekäýew