Mälim bolşy ýaly, Ýaponiýa dürli bakja önümleriniň we miweleriň ilkinji hasylynyň gymmat bahadan satylýan ýurdudyr. “NHK” teleýaýlymyň beren maglumatyna görä, ýurduň merkezi bölegindäki Isikawa prefekturasynda geçirilen auksionda üzümiň seýrek duş gelýän görnüşi bolan “rim rubini” görnüşiniň bir hoşasy 1,5 million ýene (takmynan 10.7 müň dollar) satyldy.

Bu üzümiň bir hoşasyny ýerli myhmanhana zynjyry bolan kompaniýanyň wekili satyn aldy. Bu üzümiň 27 sany miwesi bolup, ol hem myhmanhananyň hemişe gelýän myhmanlaryna hödür ediler.

Üzümiň “Rim rubin” görnüşi 2008-nji ýylda ýapon seleksinerler tarapyndan işlenip taýýarlandy. Onuň bir hoşasyndaky miwesiniň ululygy stoluň üstünde oýnalýan tennis topy ululygynda bolýar.

Üzümiň bu elit sortunyň düzüminde şekeriň möçberi azyndan 18 göterime deňdir. Şonuň üçin Ýaponiýada üzümiň bu sorty süýjülik hasaplanýar.

Ýaponiýa miweleriň we ir-iýmişleriň käbir sortunyň gymmatlygy bilen tapawutlanýar. Olaryň bahasy onlarça müň dollara barabar bolýar. Bilşiňiz ýaly, Ýaponiýada gawunyň “Ýubari” sorty hem örän gymmat bahadna satyldy.