Şahyr redaksiýa goşgy getirdi.
Okady redaktor, okady müdir.
Ikisi-de diýdi: "Goşgy erbet däl,
Arkaýyn ötägit, çap bolar ertir".

"Ýöne weli... diýip, sakyndy müdir -
Goşgy bir setirjik ýetirýär zeper.
Manysy yrgarak. Düzedilmese,
käbir nadan başga tarapa çeker".

Sypaýy adamdy çal saçly müdir,
Awtor sypaýydy ondanam beter.
Iki edepliniň bolan ýerinde,
Birisi hemişe parhlylyk eder.

Parhlylyk awtoryň paýyna düşdi,
"Bolýar" diýip, aldy galamyn ele.
Ýanyp-ýanyp çykan ýeke täk sözi
Ýanyp ýetişmedik ýetmiş söz bile
Çalşyrdy. Üýtgetdi. Ýene çalşyrdy.
Ýene-de üýtgetdi. Çykady derek.
Bozdy. Ýazdy. Bozdy. Ýene-de ýazdy.
Onsoň okap gördi ýene bir gezek.

Bolmady. Öýüne äkitdi onsoň.
Ruçkasyn çeýnäp, sypalap saçyn,
Oturdy, çygyldy tutuş bir agşam,
Çygyldy iki gün. Çygyldy üç gün.

Çygyldy ýene-de dördülenji gün.
Ýene. Ýene... Setir düzelmän galdy.
Şahyr düzetmäge razydam welin,
Zehinli kes-kelläm razy däldi.