Metbugatda çykan goşgulamdan soň,
Mugallymym «Salam» aýdypdyr, eje.
Haýyrly gurbanlar, haýyrly günler
Indi biziň sary gaýdypdyr, eje.

Tekrarlapdyr: «Oba gelse, görünsin.
Asmandan pel-pellän, ýere-de düşsün,
Sen aýt oňa, bir azajyk köşeşsin»,
Maňa tekepbirdir öýdüpdir, eje.

Swetaýewa, Puşkin, Ýesenin.., mekdep!
Şäher. Kitaphana. Durşuna edep,
Özümden başgany okaýan küt-küt,
Okaman ýaşasam, göýdük men, eje.

Aýt, heniz ýazylmaly hatlar bar,
Sahaplary zümmerretden gatlar bar,
Ýürek çekip ugradýaryn, çatlar bar,
Olam, hakyt, maňa şeýdipdir, eje.

Metbugatda çykan goşgulamdan soň,
Mugallymym «Salam» aýdypdyr, eje.
Gynanypdyr goşga höwrügenime,
Ol maňa şahyrdyr öýdüpdir, eje.

Orazbibi Mälikguly gyzy.