Gözdaňdy oýnuny oýnaýar ýaşlar,
Tutan oglan posa alýar muzduna.
Tutup bir-biregi ogşaýar ýaşlar,
Biz bu oýny oýnapdyrys mugtuna...

Gözi daňlan aýlanyp ýör arada,
Ol derleýär,
ol sermeýär howany:
«Jadyly gyz, nirede sen,
nirede?»
Nirede sen, onuň söýýän juwany?

Til bile däl, jiger bilen seslenýär:
«Men bärde,
men bärde! Tutaý bol basym!»
Oglan gyzlaň birin jeren deý garbap,
Öpýär söýýänin däl, onuň boýdaşyn...

Biz dünýäni oýun sanyp köýýäris,
Çyn sanybam,
halys dönýäs bijine.
Bu bir durmuş: biz birini söýýäris,
Ýassykdaş bolýarys
gaýry birine...

Nobatguly Rejebow