Ol gün gar ýagypdy diýýär ejem-ä,
Şondan başga ýokdur meger, bilýänem.
Dönüp misli gelnaljyly kejebä,
Kaka, girendirin seniň dünýäňe.

Gijelerne aglap ýatan däldirin,
Uklap bilmän, ýürek-bagryň ýakansyň.
Belki, seň göwnüňe ýeten däldirin,
Belki, her dem buýsanç bilen bakansyň.

Aýak bitip, ýörjen-ýörjen bolansoň,
Oýnandyryn öýe köwlenip bilmän.
Belki-de sen menden nadyl bolansyň,
Öwretjek zatlarňy öwredip bilmän.

Bar zat geçdi gitdi sil ýaly bolup,
Günleriň kirini ýuwdy ýagyşlar.
Başarmadyk bolsam il ýaly bolup,
Kaka, kelpez perzendiňi bagyşla!

Serimde ýaşlygyň yşky gaýnaýar,
Bilmedim joşgunmy ýa boş salgymmy?!
Durmuş derýasynda boýum boýlaman,
Ýa-da deň-duşlamdan üzlüp galdymmy?!

Günleň tüweleýne erk edip bilmän,
Gökde gaýyp ýören tozga ýaly men.
Bilmedim, nireden serime gelýär,
Öz ykbalym üçin özge ýaly men.

Kalbymyň gül açyp, joşmaly wagty,
Deprege däl, aşyk boldum gyjaga.
Meger, şonuň üçin Aýdan-a ýagty,
Gijedenem ylham girýär gujaga.

Gynanma, joşaryn sil ýalyp bolup,
Köňülleň gussasyn ýuwar ýagyşlar.
Wah, men başaramok il ýaly bolup,
Ýalňyşýan bolsamam, meni bagyşla!

Aşyr Hanow.