Bir gyzyň ugrunda awaranyň sen.
Sen onuň ugrunda bar zada kaýyl.
Entek kimdiginem bilmersiň weli,
Şol diýip, ölüme gitmäge taýyn.

Gyzam awaradyr seniň ugrunda,
Belki, ol sendenem awarakdyr.
Ýöne ol gyzyň hem seň kimdigiňden,
Niredendigiňden habary ýokdur.

Gözlärsiň, taparsyň, guçarsyň bir gün.
Guwanç bilen ýatlaşarsyň geçenňi.
Diyersiň: "Ol mensiz, men bolsa onsuz
Nädip ýaşadykkak şu wagta çenli?"

Bardyr durmuşyňda ýene bir gözleg,
Ol gözlegem edil şol gözleg ýaly:
Ol hem seni yşky bilen jadylar
Şol ýaňaklar ýaly, şol gözler ýaly,
Gözlärsiň sen ony. Ýöne özüňem
Mynasyp gereksiň, ol gözler ýaly.

Mynasyp bolmasaň, aýlanyp ýeter.
Mynasyp bolaýsaň, myradyr biter.
Onsoň seň öňüňde durjak güýç ýokdur.
Gudratyň daglary ýarmaga ýeter.

Ýene-de diýersiň: "Şeýle gudratsyz
Nädip ýaşadymkam, şu wagta çenli?"
Söýgüli ýar bilen söýgüli hünär
Iki sany ýürek bolara çemli.

Ine, şeýdip bir göwräniň içinde
Üç ýüregi urdurmagy başarsaň.
Ondan soň diňe bir dagy ýarmak däl,
Täzeden dag ýasamagam başarsyň

Kerim Gurbannepesow