Ilki-ilkiler bolmajydyň,
Gaty gülüp, pakyrdap.
Şonda taňkaňam gaýnardy,
Taňka ýaly lakyrdap.

Soň-soňlar-a wakyrdaman,
Hikirdäpjik, jykyrdap,
Takyrdaman, şakyrdaman,
Tykyrdapjyk, şykyrdap.

Tapsaň, alabaşagaýdyň,
Emedekläp, dükürdäp.
Derrew taňkaňam gaýnardy,
Özüň ýaly kikirdäp.

Ölügsije tüsseläpjik,
Ysgynsyzja şytyrdap,
Ogluň-gyzyň gözýaşyna,
Suwa düşdüň şapyrdap.

Ýetensoňam başlaýadyň,
Baýguş ýaly jakyrdap.
Äňiň sypara gelýärdi,
Samahyllap, sakyrdap.

Öz etiňi, öz süňküňi,
Gemiripdiň kitirdäp.
Iň soňunda derek tutman,
Pytrap gitdiň pitirdäp.

Laçyn Pürjäýewa
10.09.1998ý.